महिला, बालबालिका, लैङ्गिक तथा यौनिक अल्पसंख्यक तथा सामाजिक सुरक्षा मन्त्री सीता बादीले महिलाको सुरक्षालाई तत्काल सुनिश्चित गर्न लक्षित उपायका रूपमा ‘ब्लु बस’सेवा सञ्चालनमा ल्याइएको बताएकी छन्।
बिहीबार राष्ट्रिय सभाको बैठकमा सांसदसँगको प्रश्नोत्तर कार्यक्रममा बोल्दै उनले ‘ब्लु बस’ सेवा महिलालाई अन्य सार्वजनिक यातायात प्रयोग गर्नबाट रोक्ने वा नियमित सार्वजनिक यातायात प्रणालीलाई प्रतिस्थापन गर्ने उद्देश्यले नभई सार्वजनिक यातायातमा महिलाले भोग्दै आएका यौनजन्य दुर्व्यवहार, असुरक्षा, अत्याधिक भीडभाड तथा आवागमनका व्यवहारिक कठिनाइलाई सम्बोधन गर्न ल्याइएको बताएकी हुन्।
'यस सेवाले महिलालाई अन्य सार्वजनिक यातायात प्रयोग गर्ने कुरामा रोक लगाउँदैन। र नियमित सार्वजनिक यातायात प्रणालीलाई प्रतिस्थापन पनि गर्दैन। त्यसैले यो लैंगिक असमानतातार्फ धकेल्ने कदम नभई विद्यमान असमान जोखिम न्यूनिकरण गर्ने विषयलाई लक्षित र आवश्यकतामा आधारित उपाय हो। सरकारको दीर्घकालिन लक्ष्य महिला र पुरुषलाई अलग अलग यात्रा गराउनु होइन,' उनले भने।
योसँगै महिलाले सार्वजनिक बसमा भोगिरहेका जोखिम र दुर्व्यवहारलाई तत्काल सम्बोधन गर्नु पनि सरकारको जिम्मेवारी रहेको बताइन्।
'त्यसकारण महिलाको तत्काल सुरक्षा सुनिश्चित गर्नको लागि र सबैको लागि सम्मानजनक सार्वजनिक यातायात प्रणाली निर्माण गर्ने दीर्घकालिन सुधारलाई अगाडि बढाउनेछ,' उनले भनिन्।
