नेपाली कांग्रेसका सांसद चन्द्रमोहन यादवले धनुषाको ढल्केबरमा प्रस्तावित ट्रमा सेन्टर योजना अन्यत्रै सार्न खोजेको भन्दै संसदमा विरोध जनाएका छन्।
प्रतिनिधि सभाको शुक्रबारको बैठकमा बोल्दै उनले स्वास्थ्य तथा खाद्य स्वच्छतामन्त्री निशा मेहताले ढल्केबरमा नभई अन्यत्रै ट्रमा सेन्टर सेन्टर बन्ने बताएको भन्दै संसदमा उभिएर विरोध जनाएका हुन्।
‘अन्यत्र ट्रमा सेन्टर बन्दा हामीलाई कुनै आपत्ति छैन। तर ढल्केवरमा जुन डेडिकेटेड ट्रमा सेन्टर थियो त्यो कहाँ हरायो ? त्यहाँ बन्ने भनिएको ट्रमा सेन्टरको योजना खारेज गर्न लागिएको छ। त्यसको विरोधमा आज दिनभरि मौन भएर यस सभामा उठेर विरोध गर्न चाहन्छु,' उनले भने।
उनले त्यसको विरोधमा जनता आन्दोलित रहेको पनि बताए।
सांसद यादवले अन्यत्र ट्रमा सेन्टर बनाउने कुरामा कुनै आपत्ति नभए पनि ढल्केवरमा प्रस्तावित ट्रमा सेन्टर जसरि पनि बन्नुपर्ने आफूहरुको माग रहेको बताए।
सदनमै उठेर विरोध गर्ने घोषणा गरेपछि रास्वपा सांसद मनिष खनालले नियमापत्ति जनाएका थिए।
उनले संसदमा शून्य समय, विशेष समयको दुरूपयोग भएको भन्दै नियमापत्ति जनाएका थिए।
सांसद यादवले उठेर विरोध कायम राखेपछि सभामुखले संसद सचिवालयका कर्मचारीहरूसँग केहीबेर छलफल गरी पुनः यादवलाई नै बोल्न दिएका थिए।
दोस्रो पटक बोल्ने समय पाएपछि ढल्केबरमा बन्ने भनिएको ट्रमा सेन्टरबारे स्वास्थ्य मन्त्री वा अर्थमन्त्रीले दिनुपर्ने माग राखे।
'उहाँहरूले यसबारे संसदमा जबाफ दिनुभयो भयो मैले मेरो क्षेत्रका आन्दोलित जनतालाई भन्न पाउने थिएँ,' उनले भने।
त्यसपछिप सभामुख डिपी अर्यालले यसबारे भएको के हो खुलाउन भनेर सरकारको नाममा रूलिङ गरेका छन्।
धनुषाको हालको मिथिला नगरपालिका–७ मा ऐलानी जग्गालाई आधार मानेर संघीय सरकारले आर्थिक वर्ष २०७८/७९ को बजेटमा धनुषाको ढल्केवरमा ट्रमा सेन्टर निर्माण गर्ने शीर्षकमा पहिलो पटक रकम विनियोजन गरेको थियो।
त्यसयता हरेक वर्ष उक्त शीर्षकमा बजेट विनियोजन हुँदै आए पनि ट्रमा सेन्टर निर्माणको कार्य अघि बढ्न सकेको छैन।
