प्रतिपक्षी दल नेपाली कम्युनिस्ट पार्टी (नेकपा)का प्रमुख सचेतक युवराज दुलालले प्रधानमन्त्रीले संसदमा जबाफ दिनुपर्ने माग छाड्न मिल्ने खालको नरहेको बताएका छन्।
शुक्रबार प्रतिनिधि सभा बैठकमा बोल्दै दुलालले सीमाबारे प्रधानमन्त्रीले दिएको अभिव्यक्तिमा लामो समयदेखि प्रतिपक्षीहरूले जबाफ माग गरिरहेको र यो त्यसै छाड्न मिल्ने माग नरहेको बताएका हुन्।
'सदनमा हामीले लामो समयदेखि प्रधानमन्त्री ज्यूले संसदमा आएर बोल्दाखेरि नेपालले पनि भारतको धेरै ठाउँको जग्गा मिचेको छ भन्ने अभिव्यक्तिलाई सच्याउन, स्पष्टीकरण दिन अथवा रेकर्डबाट हटाउन माग गर्दै आएका छौं। जुन माग हामीले छाड्न सक्ने खालको होइन, छैन,' उनले भने।
प्रमुख सचेतक दुलालले अगाडि भने, 'यसमा राष्ट्रियताको सबाल छ, हाम्रो जमिनको सबाल छ। राष्ट्रको लागि आवश्यकता पर्दा रगत बगाउन सक्छौं। शीर बलि चढाउन सक्छौं तर हामी राज्यप्रतिको कुनै पनि विवादास्पद भनाइलाई राष्ट्रिय रेकर्डमा राखिराख्न सक्दैनौं,'
उनले संसदलाई मर्यादित र व्यवस्थित रूपमै सञ्चालन गर्ने सभामुखको इच्छाशक्तिमा नेकपा र आफ्नो सधैँ समर्थन रहेको बताए।
त्यसैले त्यस्ता विषय कि रेकर्डबाट हट्नुपर्ने कि प्रधानमन्त्रीलाई जबाफ दिन संसदमा उपस्थित हुन सभामुखबाट रूलिङ हुनुपर्ने उनको माग थियो।
'उहाँले यहाँबाट जबाफ दिनुभयो भने यो समस्या समाधान हुन्छ। प्रधानमन्त्री संसदको सबैभन्दा ठूलो नेता हुनुहुन्छ। सबैभन्दा पहिले यो संसदलाई कसैले सम्मान गर्नुपर्छ, यसको नियम पालना गर्नुपर्छ भने त्यो राष्ट्रिय स्वतन्त्र पार्टीको दल नेता नेपालको सम्मानीय प्रधानमन्त्री बालेन्द्र शाहले नै सुरूवात गर्नुपर्छ,' उनले भने।
त्यस्तै नियमावलीअनुसार सांसदहरूको प्रश्नोत्तर कार्यक्रममा सहभागी हुन पनि सभामुखबाट रूलिङ हुनुपर्ने दुलालले माग गरे।
