राष्ट्रिय प्रजातन्त्र पार्टीका संसदीय दल नेता ज्ञानेन्द्र शाहीले सरकारलाई प्रश्न गरेकै कारण आफूविरुद्ध साइबर बुलिङ र चरित्र हत्या गरिएको आरोप लगाएका छन्।
प्रतिनिधिसभाको सोमबार बसेको बैठकमा बोल्दै शाहीले आफूविरुद्ध मदिरा सेवन गरेको र अश्लील भिडिओसँग जोडेर भ्रम फैलाइएको दाबी गरेका हुन्।
सामाजिक सञ्जालमा आफ्नो नाम जोडेर अश्लील भिडियो प्रसार गरिएको भन्दै उनले त्यसको अनुसन्धान गरी दोषीमाथि कारबाही गर्न सरकारसँग माग गरे।
शाहीले सरकारलाई कर्णालीका जनताको समस्याबारे प्रश्न उठाएपछि आफूविरुद्ध व्यक्तिगत आक्रमण र चरित्र हत्या सुरु भएको दाबी गरे।
'मेरा कर्णालीका मानिस मर्दा, कर्णालीका जनताले पीडा भोग्दा यो मेरो सरकार हो कि तेरो सरकार हो भनेर म हेर्दिनँ। म कर्णालीका पीडित जनताको आवाज उठाउँछु,' उनले भने।
उनले सामाजिक सञ्जालमार्फत हुने चरित्र हत्या र गलत सूचना फैलाउने प्रवृत्ति कलाकार, खेलाडी, पत्रकार र व्यापारीले समेत भोगिरहेको बताए। यस्ता गतिविधिमा संलग्नलाई सरकारले कारबाही गर्नुपर्ने उनको माग थियो।
शाहीले प्रतिपक्षको मुख्य काम सरकारलाई प्रश्न गर्ने र खबरदारी गर्ने भएको भन्दै प्रश्न उठाउनुलाई सरकारको काममा अवरोधका रूपमा नलिन आग्रह गरे।
'प्रतिपक्ष हामी विरोधी होइन, तपाईंको सहयात्री हो,' उनले भने।
आफू सरकार ढाल्ने खेलमा नरहेको भन्दै उनले वर्तमान अंकगणितमा प्रतिपक्षले सरकार ढालेर नयाँ सरकार बनाउन सक्ने अवस्था नरहेको बताए।
बरु जनताले निर्वाचित गरेको सरकार पाँच वर्ष टिकेर काम गरोस् र प्रतिपक्षको आवाज सुनियोस् भन्ने आफूहरूको चाहना रहेको उनले बताए।
