नेपाली कांग्रेसका पूर्वमहामन्त्री तथा संस्थापनइतर पक्षले गर्न लागेको राष्ट्रिय भेलाका संयोजक शशांक कोइरालाले कांग्रेस सभापति गगन थापालाई गाली नगर्न आग्रह गरेका छन्।
सभापति थापामाथि गाली गर्दा झन् त्यसले गगनको महत्त्व दर्साउने उनको भनाइ छ।
‘हामी गगन थापालाई किन गाली गर्छौं? गाली गर्नै पर्दैन होइन र? गाली गर्यो भने झन् उसलाई महत्त्व दिएको हुन्छ,’ कांग्रेस सिन्धु–काठमाडौंले आज आयोजना गरेको कार्यक्रममा कोइरालाले भने, ‘किन तपाईंहरू गगनलाई गाली गर्नुहुन्छ, केही भन्दै नभन्नुस्, त्यो नै सबैभन्दा ठूलो अपमान हो। अब म अरू के भनौं?’
उनले आफूलाई अप्ठ्यारो ठाउँमा नेताहरूले उभ्याइदिएको पनि बताए।
‘मैले आफ्नो जीवनमा आज मलाई अत्यन्त अप्ठ्यारो ठाउँमा उभाइदिनुभएको छ नेताहरूले। संयोजक बनाएर। म एक्लो मान्छे हो तर म के चाहन्छु भने सबै समावेश पार्टीलाई एक गर्ने मेरो प्राथमिकता हो,’ उनले भने।
जनतालाई अधिकार दिलाउन बिपी कोइरालाले संघर्ष गरेको पनि उनको भनाइ थियो।
