भारतीय विदेश मन्त्रालयका प्रवक्ता रणधीर जैसवालले नियमित पत्रकार सम्मेलनका दौरान भारतीय प्रधानमन्त्री नरेन्द्र मोदीको तर्फबाट पदभार ग्रहणका बेला नै नेपालका प्रधानमन्त्री बालेन शाहलाई भ्रमणको निम्तो दिइएको बताएका छन्।
उनले नेपालका लागि भारतीय राजदूत नविन श्रीवास्तवसँगको भेटवार्तामा द्विपक्षीय विषयमा कुराकानी भएको उल्लेख गरेका हुन्। उनले भ्रमणको मितिबारे सोधिएको प्रश्नमा भने आफूलाई जानकारी भएपछि अवगत गराउने बताए।
भारतीय पत्रकारहरूले नेपालका प्रधानमन्त्रीसँग भारतीय राजदूतको भेट, भारतीय विदेश मन्त्री एस जयंशकरको नेपाल भ्रमण हुने/नहुने र सुगौली सन्धीको सक्कली प्रति नेपालमा भए/नभएको जानकारी नरहेको भन्ने परराष्ट्र मन्त्री शिशिर खनालको टिप्पणी र ब्रिक्स समिटमा नेपाललगायत अन्य मुलुकका प्रधानमन्त्रीको सभागिताबारे प्रश्न गरेका थिए।
तर विदेश मन्त्रलायका प्रवक्ता जैसवालले स्पष्ट जबाफ दिएनन्।
उनले ब्रिक्स सम्मेलनका दौरान भारतले क्षेत्रीय संगठनहरूलाई निमन्त्रणा गर्ने तयारी गरिरहेको बताए। 'हामीले क्षेत्रीय गठबन्धनबाट धेरै नेताहरूलाई निम्ता दिएका छौँ', जैसवालले भने, 'हामी यस विषयमा थप अपडेट गराउँदै जानेछौँ।'
त्यस्तै जैसवालले कुनै विषयमा सहमति नबने पनि नेपाल र भारतको बीचमा राम्रो सम्बन्ध रहेको बताए।
'कुनै विषयमा सहमति नबने पनि जुनसुकै विषयमा द्विपक्षीय वार्ता गर्ने संयन्त्र छन्', जैसवालले भने, 'नेपाल र भारतको सम्बन्ध राम्रो छ।'
