नेपाली कांग्रेसको संस्थापनइतर पक्षको आह्वानमा हुन लागेको राष्ट्रिय भेलामा निवर्तमान कार्यवाहक सभापति पूर्णबहादुर खड्का पनि सहभागी हुने भएका छन्।
साउन २९ देखि ३१ गतेसम्म काठमाडौंको सुकेधारामा भेला हुनेछ।
संस्थापनइतर पक्षका नेताहरूले यो भेला पूर्वमहामन्त्रीसमेत रहेका राष्ट्रिय भेला आयोजक समितिका संयोजक शशांक कोइरालाको अध्यक्षता र निवर्तमान सभापति तथा पूर्वप्रधानमन्त्री शेरबहादुर देउवाको प्रमुख आतिथ्यतामा गरिने बताउँदै आएका छन्।
देउवा बिहीबार मध्याह्न त्रिभुवन अन्तर्राष्ट्रिय विमानस्थल आइपुग्ने कार्यक्रम तय भएको छ।
संयोजक शशांक कोइरालाले आज निवर्तमान कार्यवाहक सभापति खड्कालाई उनकै निवास गोल्फुटार पुगेर कुराकानी गरेका थिए।
सो क्रममा खड्काले आफू पार्टी एकताको पक्षमा रहेको बताएका थिए। पार्टी नफुट्ने र एकताका लागि भेला आयोजना गरिएको हो भने आफू सहभागी हुने खड्काले बताएका थिए।
यसबारे जानकार नेता रामहरि खतिवडाले निवर्तमान कार्यवाहक सभापति खड्का राष्ट्रिय भेलामा उपस्थित हुने सेतोपाटीलाई जानकारी दिए। खड्का पछिल्लो समय संस्थापनइतरले खोलेको चुनदेवी सम्पर्क कार्यालय गएका थिएनन्।
‘सम्पर्क कार्यालय त उहाँ मात्र होइन, हामी पनि गएका छैनौं तर राष्ट्रिय भेलामा पूर्ण दाइसहित हामी पनि सहभागी हुन्छौं,’ खतिवडाले भने, ‘हामी पार्टी एकताका पक्षमा छौं, पार्टी एकताका लागि हुने भेलामा सहभागी हुन्छौं। आज बिहान पनि शशांक कोइरालासँग भएको कुराकानीमा उहाँले म भेलामा सहभागी हुन्छु भन्नुभएको छ।’
गत पुसमा भएको विशेष महाधिवेशनमा सहभागी नरहेका संस्थापनइतर पक्षले प्रदेश भेलाहरू सकेर राष्ट्रिय भेला गर्न लागेका हुन्।
यो भेलामा नेता शेखर कोइराला पनि सहभागी हुने भएका छन्।
