सार्वजनिक लेखा समितिमा राष्ट्रिय स्वतन्त्र पार्टीका सांसद खगेन्द्र सुनारको टिप्पणी र नेपाल प्रहरीका महानिरीक्षक दानबहादुर कार्कीको जबाफबारे सभामुख डोलप्रसाद अर्यालले चासो व्यक्त गरेका छन्।
अर्यालले घटनाबारे समिति सभापति भरतबहादुर खड्का, समिति सचिव बबिता मिश्र र संघीय संसद सचिवालयका महासचिव पद्मप्रसाद पाण्डेयसँग छलफल गरेका हुन्।
सार्वजनिक लेखा समितिमा बुधबार सांसद सुनारले प्रहरी महानिरीक्षकमाथि प्रहरीको पोशाक खरिदमा भ्रष्टाचार गरेको आरोप लगाउँदै छानबिन गर्न माग गरेका थिए। उनले आइजिपी कार्कीमाथि अमर्यादित टिप्पणी गरेका थिए।
‘प्रहरीको भाटा खरिदमा समेत भ्रष्टाचार हुनु दुर्भाग्यपूर्ण छ। विपन्न वर्गका छोराछोरी प्रहरीमा भर्ना भएर देशको सेवा गरिरहेका छन्, तर उनीहरूले प्रयोग गर्ने सामग्रीको खरिदमा माथिल्लो निकायबाट व्रह्मलुट भइरहेको छ। बर्दी लगाएर वा पदमा बसेर आफूमाथिको छानबिनलाई प्रभावित पार्न पाइँदैन,' सुनारले भनेका थिए, 'सार्वजनिक खरिदमा हुने अनियमिततालाई फौजदारी अभियोगका रूपमा अगाडि बढाउनुपर्छ।’
जबाफमा महानिरीक्षक कार्कीले निष्ठापूर्ण काम गरेको मान्छेलाई लेखा समितिमा ल्याएर जे मन लाग्यो त्यही भन्ने काम गरेको भन्दै आपत्ति जनाए।
'जे मन लाग्यो त्यही भन्ने स्थान होइन होला त यो। कुनै पनि ठाउँको एउटा सामान्य मर्यादा त हुन्छ होला नि,' कार्कीले भनेका थिए, 'हाम्रा (सांसदका) पनि निवेदन परेका छन् नि, सबैका परेका निवेदन यस्तै गरी आउँदा गाह्रै पर्छ। अब म पनि सोच्दै छु, ल्याऊँ कि क्या हो।’
यसरी सांसद र प्रहरी महानिरीक्षक तल्लो स्तरमा उत्रिएर वाद प्रतिवादनमा उत्रँदा संसदीय समितिको गरिमा घटेको टिप्पणी भएपछि सभामुख अर्यालले चासो देखाएका हुन्।
लेखा समिति सभापति भरतबहादुर खड्काले सभामुखले समितिमा भएको घटनाबारे चासो व्यक्ति गरेको सेतोपाटीलाई बताए।
'संसदीय समिति चलायमान बनाऔं। मर्यादित बनाऔँ, जवाफदेही बनाऔँ भन्ने उहाँको चासो थियो,' खड्काले भने, 'हिजोको घटनामा पनि कन्सर्न राख्नुभयो। मैले यथार्थ बताएँ।'
सभामुखले कुराकानीमा जनप्रतिनिधिले बैठकमा संयम भएर धारणा राख्नुपर्ने आवश्यकता औँल्याएको खड्काले बताए।
'मर्यादित, संयम र शिष्ट भएर विषयवस्तुभित्र रहेर सांसदहरूले धारणा राख्नु उपयुक्त हुने सभामुखले बताउनुभयो,' खड्काले भने, 'जनप्रतिनिधिको बोली शिष्ट र भाषा मर्यादित हुनुपर्छ भन्नुभयो।'
आफूले पनि भेटमा एक अर्कालाई सम्मान गर्ने मानवीय गुण विकास गर्नुपर्ने धारणा राखेको खड्काले उल्लेख गरे।
'शिष्ट भाषामा धारणा राख्ने विषयमा चिन्ता व्यक्त गर्यौँ,' खड्काले भने, 'सांसदहरूलाई अनुशासित बनाउन अभिमुखीकरण गर्ने कुरा पनि भयो।'
भेटमा खड्काले सांसदहरुलाई सम्बन्धित दलले पनि मर्यादित तरिकाले प्रस्तुत हुन आग्रह गर्नुपर्नेमा जोड दिएका थिए। 'असंसदीय घटना समितिमा भएको हो', खड्काले भने, 'अब यस विषयमा के गर्ने/नगर्ने उहाँहरुको पार्टी भित्रको कुरा हो।'
-1776407410.jpg)
