प्रतिनिधिसभाको कानुन, न्याय तथा मानव अधिकार समितिकी सभापति समीक्षा बास्कोटाले समितिमा बोलिने भाषा र व्यवहारमा सचेत रहन आग्रह गरेकी छन्।
आज समिति बैठक सुरू गर्दै उनले समितिमा सांसदहरूले प्रयोग गर्ने भाषा, शब्द र व्यवहारप्रति ध्यानाकर्षण गरेकी हुन्।
‘समितिमा हामीले आमन्त्रित गर्ने व्यक्तिहरू कुनै न कुनै संगठनका प्रमुख, कुनै न कुनै मन्त्रालयदेखि लिएर निकायका प्रमुख रहेर काम गरिरहनु भएको स्थिति भएकोले हामीले यहाँ बोलिने भाषा, हामीले प्रयोग गरिने शब्द र हामीले प्रयोग गर्ने व्यवहार यो सम्पूर्ण आम नागरिकले पनि हेरिराख्नुभएको हुन्छ,’ उनले भनिन्, ‘यो हिसाबले समितिमा बोल्ने विषयमा विषयान्तर नभइकन र हामीले प्रयोग गर्ने भाषामा पनि त्यत्तिकै सचेत र संवेदनशील भएर विषय उठान गर्दिनुहुन्छ भनेर सदस्यहरू र आमन्त्रित सम्पूर्ण व्यक्तित्वहरूमा हार्दिक अनुरोध गर्न चाहन्छु।’
हालै सार्वजनिक लेखा समितिमा अमर्यादित व्यवहार भएको भन्दै सभामुखले पनि चासो राखेका थिए।
