नेपाली कांग्रेसका उपसभापति विश्वप्रकाश शर्माले निवर्तमान सभापति शेरबहादुर देउवा स्वदेश फर्किंदा लिखित रूपमा दिएको वक्तव्यमा व्यक्त 'परिवर्तन आत्मसात् र युवा अघि बढाउने कुरा'लाई केन्द्रमा राखेर राष्ट्रिय भेला आयोजना होस् भनेका छन्।
बिहीबार स्वदेश फर्केका देउवाले अपिल जारी गर्दै परिवर्तन आत्मसात् गरेको र युवाहरूलाई अघि बढाउने कुरा गरेका थिए।
देउवाको लिखित रूपमा आएको त्यो अभिमतलाई स्मरण गर्दै आज सानेपामा भएको केन्द्रीय कार्यसमितिमा बोल्दै उपसभापति शर्माले भने, ‘निवर्तमान सभापति शेरबहादुर देउवा हिजो काठमाडौं फर्किनुभयो। हामीले स्वागत पनि गर्यौं, केन्द्रीय समितिमा सभापति गगन थापा बोलेर र निर्णयबाट। यो बेला हाम्रो अपेक्षा थियो निर्वतमान सभापतिले भनिदिनुपर्थ्यो- म लामो समयपछि देश फर्केको छु, म सबैको सुन्न चाहन्छु, यो बेला सबै एक हुन जरूरी छ। यद्यपि उहाँको लिखित अभिव्यक्तिमा आएको छऔ परिवर्तन आत्मसात् गर्ने कुरा र युवा अघि बढाउने कुरा। यो दुवै कुरामा कांग्रेस अहिले छ। उहाँ स्वयमले व्यक्त गरेको त्यो अभिमत अहिले हुँदै गरेको सम्मेलनमा पनि केन्द्रमा राखियोस्।’
संस्थापनइतर पक्षले आजदेखि साउन ३१ गतेसम्म काठमाडौंको सुकेधारामा राष्ट्रिय भेला गर्दैछन्। उक्त भेला सुरू हुनुअघि अहिलेसम्म कांग्रेसले एकताका लागि गरेका प्रयासबारे उपसभापति शर्माले केन्द्रीय समितिमा जानकारी गराएका थिए।
उपसभापति शर्माले मुलुकमा अहिले ३६ वर्षका बालेन शाह प्रधानमन्त्री रहेको र त्यसभन्दा केही वर्षका गगन थापा कांग्रेस सभापति रहेको पनि उल्लेख गरेका थिए।
‘३६ वर्षका युवा प्रधानमन्त्री भएको कुरा आत्मसात् गर्दै विधि र पद्धतीबाट कांग्रेस नेतृत्वमा आइपुगेका सोही उमेर हाराहारीका गगन थापालाई पनि आत्मसात् गरौं,’ उनले भनेका थिए, ‘पार्टी नेतृत्व स्वीकार नगर्ने हो भने गम्भीर प्रश्न उठ्न सक्छ।’
उनले मंसिरअघि नै १५ औं महाधिवेशन हुने भन्दै पार्टी एकताकै पक्षमा आफूहरू रहेको बताए।
