राष्ट्रिय स्वतन्त्र पार्टीकी सांसद अपसना बानुले जेनजी आन्दोलनमा सहभागी युवा थुनामा परेका घटनाका कारण आफू एन्जाइटीको सिकार भएको बताएकी छिन्।
प्रतिनिधि सभाको कानुन न्याय तथा मानव अधिकार समितिमा गृहमन्त्री सुधन गुरूङ, कानुन मन्त्री सोविता गौतम र प्रहरी महानिरीक्षक दानबहादुर कार्कीको अगाडि सांसद बानुले आफूले मानसिक तनाव खेप्नुपरेको बताएकी हुन्।
'जेनजी आन्दोलनबाट म मात्रै सांसद बनेको होइन होला, मेरो मात्रै काँधमा यो जिम्मेवारी छैन होला। अन्य साथीहरू पनि सांसद बन्नुभएको छ। तर जहिले पनि ममाथि नै कल फरवार्ड गरिन्छ। सांसदहरूले 'उहाँले हेर्दै हुनुहुन्छ यो मुद्दा, उहाँलाई भन्नुहोस्' भनेर भन्नुहुन्छ,' बानुले भनिन्, 'किनभने म यो कुराले एन्जाइटीमा परेको छु। मैले धेरै दिनसम्म ब्रेक लिनुपरेको छ। मलाई मानसिक तनाव धेरै बढेको थियो। म कसैसँग बोल्ने स्थितिमा थिइनँ।'
सांसद बानुले जेनजी आन्दोलनकै कारण कोही सांसद मन्त्री र प्रधानमन्त्री हुने तर कोही थुनामा बस्नुपर्ने अवस्था अन्त्य हुनुपर्ने बताइन्।
जेनजी आन्दोलनमा सहभागी भएकै कारण २७ सय युवा जेलमा रहेको उनले उल्लेख गरिन्।
'आज आन्दोलनमा सरिक भएको कारणले कोही कता छन्, अनि तिनै आन्दोलनमा सरिक भएका कारण कोही जेलभित्र निस्सासिएर बसेका छन् भन्ने कुराले मलाई एकदम मन पोलिरहेको हुन्छ,' बानुले भनिन्, 'उहाँहरूलाई निकाल्न नसक्नुमा मलाई यत्तिकै मन दुखिरहेको छ। साथीहरू चाहिँ ममाथि कल फरवार्ड गरिदिनुहुन्छ, 'उहाँले गर्नुहुन्छ' भन्नुहुन्छ। कतिजनाले चाहिँ 'तिम्रो दिदीले हेर्छन् नि त्यो केस, गएर तिम्रो दिदीलाई भन्देऊ' भन्ने खालको पनि प्रतिक्रिया आउँदो रहेछ। यसको लागि चाहिँ म साह्रै निराश भएको छु।'
जेनजी आन्दोलनबाट आफूसँगका धेरै साथी सांसद बनेको उनले बताइन्।
जेलभित्र रहेका युवाहरूको अभिभावकले आफूलाई निरन्तर फोन गर्ने गरेको उनले बताइन्।
'जेन जीहरूले 'मैले मेरो देशको निम्ति चाहिँ आवाज उठाए तर मलाई चाहिँ अपराधीको उपनाम दिइयो' भन्ने खालको उहाँहरूको मनासय नहोस्,' बानुले भनिन्, 'आन्दोलनकै कारण कोही सांसद, कोही मन्त्री र कोही प्रधानमन्त्री भएका छौँ। अदम्य साहस देखाउनेहरू जेलमा हुनुहुन्छ।'
