नेपाली कांग्रेसका उपसभापति विश्वप्रकाश शर्माले २०८३ साल मंसिरभन्दा उता महाधिवेशन लैजान सक्ने संवैधानिक कानुनी बन्दोबस्त नरहेको बताएका छन्।
सानेपामा जारी केन्द्रीय समिति बैठकमा आज धारणा राख्दै उपसभापति शर्माले मंसिरभित्रै १५ औं महाधिवेशन हुने बताए।
‘२०८३ साल मंसिरभन्दा उता महाधिवेशन लैजान सक्ने संवैधानिक कानुनी बन्दोबस्त छैन, कतिपयलाई यससम्बन्धी प्रष्टता नहोला, त्यसभन्दा ६ महिना पर पनि जान पाइन्छ भन्ने होला, म यसको केस्रा केलाउन आग्रह गर्न चाहन्छु,’ शर्माले भने, ‘हामी असोजमा निर्धारित समयमा अधिवेशन गर्नुछ, नभए पनि मंसिरभित्रै अधिवेशन हुन्छ।’
उनले पार्टी एकताका लागि आफूहरू तत्पर रहेको पनि बताए। जित र हार नभनी महाधिवेशनतर्फ केन्द्रित रहन पनि उनले आग्रह गरेका थिए।
उनले संवाद वा अदालत जेबाट टुंगो लागे पनि मंसिरअघि १५ औं महाधिवेशन हुने बताए। ‘विधानको व्यवस्थाअनुसार सभापति बन्न ५१ प्रतिशत ल्याउनुछ तर ५१ होइन गगन थापाको नामम ७१ प्रतिशत मत ल्याएर सभापति बनाएर कांग्रेसमा नयाँ ऊर्जासहित जान प्रतिबद्ध छौं,’ उनले भने।
