नेपाली कांग्रेस रामेछापका निवर्तमान सभापति तथा पूर्वऊर्जा राज्यमन्त्री पूर्णबहादुर तामाङ (कान्छाराम) ले संस्थापनइतर पक्षले चुनदेवीमा खोलेको सम्पर्क कार्यालयमा आफूले नेपाली कांग्रेस सभापति शेरबहादुर देउवा भन्ने नेमप्लेट राखिदिएको बताएका छन्।
बिहीबार पूर्वप्रधानमन्त्री तथा निवर्तमान सभापति शेरबहादुर देउवा स्वदेश फर्केका थिए। त्रिभुवन अन्तर्राष्ट्रिय विमानस्थलदेखि उनलाई सिधै चुनदेवी सम्पर्क कार्यालय लगिएको थियो। त्यहाँ देउवाका लागि बेग्लै कोठा र नेपाली कांग्रेस सभापति लेखेको नेमप्लेट पनि राखिएको थियो।
आज आयोजित राष्ट्रिय भेलामा बोल्दै कान्छारामले उक्त नेमप्लेट आफूले राखेको बताए।
‘कुनै नेतालाई नसोधी मैले शेरबहादुर देउवा सभापति भन्ने साइनबोर्ड चुनदेवी कार्यालयमा राखिदिएको थिएँ,’ उनले भने। उनलाई चुनदेवी कार्यालय खोज्न र रङरोगनलगायत व्यवस्थापन गर्न नेता शशांक कोइरालासहितले जिम्मेवारी दिएका थिए। राष्ट्रिय भेलामा पनि कान्छारामलाई भोजनलगायतको जिम्मेवारी दिइएको छ।
