नेपाली कांग्रेसका नेता तथा पूर्वअर्थमन्त्री प्रकाशशरण महतले सामाजिक सञ्जालबाट प्रभावित भइएछ भन्दै आमनागरिक घोत्लिएर सोच्न थालेको बताएका छन्।
कांग्रेस संस्थापनइतरले आज गरेको राष्ट्रिय भेलामा बोल्दै उनले फागुनको आमनिर्वाचनमा मत दिएका नागरिक र विशेष महाधिवेशनमा लागेकाहरूप्रति लक्ष्य गर्दै उनीहरू सामाजिक सञ्जालबाट प्रभावित भएको दाबी गरेका हुन्।
‘६ महिनाको प्रवासनपछि सभापति शेरबहादुर देउवा स्वदेश फर्कनुभएको छ। सरकार बनेको ४ महिनामै अन्यौल हुन थालेको छ, बरू यिनीहरू ठिक रहेछन्, हामी सामाजिक सञ्जालबाट प्रभावित भएछौं, भ्रममा परेछौं भन्ने महसुसीकरण गर्दै आम नागरिक र पार्टी पङ्ति घोत्लिएर समीक्षा गर्न थालेका छन्,’ महतको भनाइ छ।
उनले सबैलाई जोडेर १५ औं महाधिवेशन गर्दै पार्टी नेतृत्व अर्को पुस्तालाई देउवाले नै हस्तान्तरण गर्ने बताए। उनले पार्टी एकता जरूरी रहेको पनि बताएका थिए।
उनले अहिले आधिकारिकता पाएको कांग्रेससँग शरीर मात्र रहेको र आत्मा नरहेको पनि बताएका थिए। ‘अहिले आधिकारिकता जहाँ छ त्यहाँ शरीर मात्र छ आत्मा छैन, आत्मालाई जबरजस्ती शरीरबाट निकालिएको छ,’ विशेष महाधिवेशनबाट आएको कार्यसमितिलाई लक्ष्य गर्दै उनले भने।
