नेपाली कांग्रेसका निवर्तमान कार्यवाहक सभापति पूर्णबहादुर खड्काले विशेष महाधिवेशनबाट आएका पदाधिकारीलाई एकतामा फर्किन र सच्चिएर अघि बढ्न राष्ट्रिय भेलाले दवाव दिने बताएका छन्।
संस्थापनइतर पक्षले आज गरेको राष्ट्रिय भेलामा बोल्दै उनले विशेष महाधिवेशनलाई अवैधानिक भनेका थिए। त्यसकारण आफू र तत्कालीन सभापति शेरबहादुर देउवा सर्वोच्च अदालत पुगेको उनको भनाइ थियो। हालै पुनरवलोकनका लागि निवेदन दिएको र अदालतबाट अनुमति पनि प्राप्त गरेको उनले बताए।
विशेष महाधिवेशनलाई निर्वाचन आयोगका दुई आयुक्तले 'आँखामा कालोपट्टी बाँधेर' दवावमा वैधानिकता दिएको आरोप पनि उनले लगाएका थिए।
‘सभापति शेरबहादुर देउवाको नेतृत्वमा कांग्रेसलाई सम्पूर्ण रूपले एक गर्न सफल हुनेछौं। मुलुकको राष्ट्रियता संकट र खतरा छ। यसलाई जोगाउन पहिलो सर्त एकता हो। त्यही एकताको तागतमा संविधान बनाउने र अरू दलबीच एकता हुनुपर्छ। देउवाको नेतृत्वमा मुलुकमा देखिएको खतरालाई टार्दै देश र संविधान जोगाउँदै जनताका समस्या टार्दै जाने हो,’ उनले भने, ‘अवैधानिक तरिकाले विशेष महाधिवेशनमार्फत सानेपामा रहेका पदाधिकारीहरूलाई पनि यो तागले सच्याउनेछ र एकतामा फर्किन दबाब दिनेछ।’
उनले बन्द सत्रमा पनि बसेर सबै प्रस्तावहरूमाथि छलफलमा भाग लिन आग्रह गरेका थिए।
-1786714791.jpeg)
