नेपाली कांग्रेसको संस्थापनइतर पक्षको कार्यक्रम काठमाडौंमा जारी छ।
साउन २९ गते पूर्वमहामन्त्री शशांक कोइरालाको अध्यक्षता र पूर्वप्रधानमन्त्रीसमेत रहेका निवर्तमान सभापति शेरबहादुर देउवाको प्रमुख आतिथ्यतामा राष्ट्रिय भेला उद्घाटन भएको थियो।
तर बन्दसत्रमा पुग्दा यो भेलालाई सम्मेलनमा रूपान्तरण गरिएको छ। मञ्चमा राखिएको ब्यानरमा राष्ट्रिय भेला हटाएर राष्ट्रिय सम्मेलन लेखिएको हो।
भेलालाई पार्टीको विधानले चिन्दैन। त्यसैले विधानअनुसार कार्यक्रम गर्न उद्घाटन पछि बन्द सत्रमा भने यसलाई सम्मेलनमा रूपान्तरण गरिएको हो।
नेता मीनबहादुर विश्वकर्माका अनुसार सुरूमा यो कार्यक्रम राष्ट्रिय भेलाका रूपमा तय थियो। सर्वोच्च अदालतले दिएको निस्सा र पछिल्लो राजनीतिक परिस्थितिपछि भेलालाई सम्मेलनमा रूपान्तरण गरिएको उनी बताउँछन्।
‘हामीले पहिले विधानभन्दा बाहिर समानान्तर भेला तय गरेका थियौं तर यसबीचमा सर्वोच्च अदालतले निस्सा दिएको र सुरूदेखि नै यो मुद्दा सुनुवाइ गर्ने भएकोले हामीले पनि भेलालाई सम्मेलनमा रूपान्तरण गर्दै विधानभित्रै कार्यक्रम गरिएको हो,’ उनले पत्रकारहरूलाई भने।
कांग्रेस विधानले अधिवेशनहरू र सम्मेलनलाई मात्रै चिन्ने गर्छ, गुटउपगुटका भेलालाई चिन्दैन।
गत पुसमा भएको विशेष महाधिवेशनमा सहभागी नरहेका देउवा पक्षका नेताहरू सहभागी भएर भेला उद्घाटन गरेका थिए। बन्द सत्रमा यसलाई सम्मेलन भनियो र यहाँ राजनीतिकलगायत विभिन्न प्रस्तावहरूमाथि छलफल गरिएको थियो।
यो कार्यक्रम आज सकिनेछ।
