नेपाली कांग्रेसको संस्थापनइतर पक्षले काठमाडौंमा आयोजना गरेको राष्ट्रिय सम्मेलनको बन्द सत्रमा प्रस्तुत गरिएका प्रस्तावहरू पारित गरिएको छ।
शनिबार ५ प्रतिवेदन छलफलका लागि प्रस्तुत गरिएका थिए। ती प्रतिवेदनहरूमाथि समूहगत रूपमा छलफल गरी सुझावसहित पारित गरिएको नेताहरूले जनाएका छन्।
बन्द सत्रमा नेता विमलेन्द्र निधिले राजनीतिक, प्रकाशशरण महतले आर्थिक, उमाकान्त चौधरीले सांगठनिक, रमेश लेखकले कानुनी र एनपी साउदले समसामयिक घटनाक्रमबारे प्रस्ताव पेस गरेका थिए। नेताहरूले आफूले पेस गरेका प्रस्तावमाथि उठेका प्रश्नमाथि जबाफ पनि दिएका थिए।
राष्ट्रिय भेलालाई सम्मेलनमा रूपान्तरण गरिएको हो। साउन २९ गते राष्ट्रिय भेला उद्घाटन भएको थियो। आज सम्मेलन सम्पन्न गर्ने तयारी छ। आज निवर्तमान सभापति शेरबहादुर देउवा पनि बन्द सत्रमा उपस्थित छन्।
बन्द सत्रमा पेस गरिएका सबै प्रतिवेदनहरू सुझावसहित पारित भएको हो।
गत पुसमा भएको विशेष महाधिवेशनमा सहभागी नरहेकाहरूले राष्ट्रिय भेला/सम्मेलन गरेका हुन्।
