गृहमन्त्री सुधन गुरूङ केही दिनदेखि आफ्नो निर्वाचन क्षेत्र गोरखा १ का विभिन्न गाउँहरू पुगेर जनताका गुनासा र समस्या सुनिरहेका छन्।
गृहमन्त्री गुरूङ आज सहिद लखन गाउँपालिका वडा नम्बर ४ ताक्लुङ पुगेका थिए।
उक्त गाउँमा एउटा विषय उठ्यो- त्रिशूलीमा बाँसको पुल बन्दैछ र यसका लागि गृहमन्त्री सुधनले २५/२७ लाख पैसा दिएका छन्।
गाउँलेहरूले यस्तो चर्चा गाउँमा सुनिएको र यसको वास्तविकता के हो भनेर गृहमन्त्री सुधनलाई सोधेका थिए।
त्यसपछि गृहमन्त्री सुधन गुरूङले यसबारे प्रष्ट पार्छु भन्दै कुरा सुरू गरेका थिए।
‘मलाई थाहा छैन को मानिसले यस्तो भ्रम फैलायो, पुल पनि कहीँ बाँसको बन्छ यहाँदेखि त्यहाँसम्म? बाँसको पुल त यहाँबाट उ त्यहाँसम्म पनि बनाउन सकिन्न। त्यो पनि त्रिशूली नदीमा बाँसको पुल बन्छ?,’ गृहमन्त्री सुधनले भने, ‘नेपाल सरकार त्यति लाटो छ, त्रिशूलीमा बाँसको पुल राख्छ? त्रिशूलीमा कसरी राख्ने बाँसको पुल? बाँसको पुल राख्न पनि राज्यकै पैसा त होला नि! खोला वा सानो नहरमा राख्न लागेको त होइन होला। हामी सबै नागरिकले बुझ्नुपर्छ, त्रिशूलीमा बाँसको पुल राख्छ होला त? सोझा जनता भए पनि यति कुरा त बुझ्ने क्षमता हुनुपर्ने।’
त्रिशूलीमा बाँसको पुल हाल्ने भन्ने भ्रम फैलाउनेलाई जनताले प्रश्न सोध्नुपर्ने उनले बताए।
‘त्यस्ता मानिसलाई तपाईंहरूले लाजशरम् छैन भनेर सोध्नुपर्छ, त्रिशूलीमा बाँसको पुल बन्छ भनेर तपाईंहरू आफैले सोध्नुस् क्या, यो ६५ लाख वा २७ लाख आएको त्यस्तो केही पनि होइन। चुनावका बेला त उहाँहरू आफ्नै खल्तीबाट पैसा हालेर कुदिरहनुभएको थियो। २७ पैसा पनि खाएको छैन। हामीले कसैलाई पैसा दिएको छैन,’ गृहमन्त्रीले भने, ‘यसरी पैसा दिन हामीले कहाँबाट पैसा ल्याउने? नागरिकको पैसा नागरिकलाई जान्छ।’
भ्रम फैलाउनेलाई गालामा मालिस गरिदिन पनि उनले आग्रह गरे।
‘जसले यस्तो भ्रम फैलायो उसलाई गालामा मालिस गरिदिए हुन्छ, मजासँग। के कुरा गर्नुभएको भनेर,’ गृहमन्त्रीले भने, ‘मगर आयुष भनेको को हो यो? गोरखाकै हो? लाजैमर्दो। ४ नम्बरको वडा अध्यक्षले यस्तो भनेको? स्थानीय चुनाव सुरू भइसकेको छ, विचार गर्नुस्,’ उनले भने, ‘स्थानीय चुनावमा यस्तो कुरा गर्नेलाई तपाईंहरूले देखाइदिनुहोला।’
