राष्ट्रिय स्वतन्त्र पार्टीका सांसद पारमणि गेलालले सरकारका मन्त्रीहरूलाई देश नघुम्न सुझाव दिएका छन्।
प्रतिनिधि सभाको बैठकमा गेलालले मन्त्रीहरूको भिडिओ र प्रचारले जनता खुसी नहुने बताएका हुन्।
'मन्त्रीज्यूहरू तपाईंहरूको भिडिओ र प्रचारले जनता खुसी हुँदैनन्। जनताको घरघरमा मन्त्री पुग्ने होइन। सरकारका कारण समस्या समाधान भएको अनुभूति पुग्नुपर्छ,' गेलालले भने, 'देश नघुम्नुस्। देशको समस्या समाधन गर्नुस्। जनताले भन्न थालेका छन्। अनुहार फेरियो तर अवस्था जस्ताको तस्तै छ।'
उनले आफूले सरकारको विरोध गरे जस्तो सुनिए पनि संसदमा जनताको आवाज सुनाउन खोजेको बताए।
'मन्त्रीहरूलाई प्रश्न छ - देश घुम्ने रहर हो कि समस्या समाधान गर्ने हुटहुटी? बिदामा घुम्न गए जस्तो गर्नु भन्दा मन्त्रालयमा बस्नुस्। नीति बनाउनुहोस्। निर्णय गर्नुस् र कर्मचारीको मनोबल उच्च बनाउनुहोस्,' गेलालले भने, 'देशका १६५ निर्वाचन क्षेत्रका समस्या र समाधानका उपाय त्यस क्षेत्रका सांसदहरूले दिन सक्नुहुन्छ। त्यसका लागि जम्बो सल्लाहकार राखेर राज्यको ढुकुटी रित्याउन आवश्यक छैन।'
उनले जनताले ग्यास, मल सहित आधारभूत स्वास्थ्य सेवाका लागि तड्पिरहेको बताए।
'आज जनता ग्यास, मल, सञ्चार सेवा र विद्युत र आधारभूत स्वास्थ्य सेवाका लागि तड्पिरहेका छन्। मन्त्रीलाई सामान्य रुघा लाग्दा हेलिकप्टर उपलब्ध हुन्छ,' गेलालले भने, 'तर जनता मर्न लाग्दा अस्पताल पुग्ने साधन हुँदैन। डाक्टर हुँदैनन्।'
