सत्तारूढ राष्ट्रिय स्वतन्त्र पार्टी (रास्वपा) की सांसद तथा पूर्वउपसभामुख इन्दिरा रानामगरले प्रतिनिधिसभाको सोमबारको बैठकमा सामाजिक सञ्जालमा आफूबारे गरिएको टिप्पणीले दिएको पीडा पोखेकी छन्।
मानव बेचबिखन तथा ओसारपसार नियन्त्रण पहिलो संशोनन विधेयक माथिको छलफलमा उनले आफूलाई 'वेश्या र चाइल्ड ट्राफिकर' भनेर कमेन्ट गरिएको बताएकी छन्।
यद्यपि रानामगरले उक्त विधेयकमा पनि धेरै ठाउँमा वेश्यावृत्ति र वेश्यागमन भन्ने शब्द प्रयोग गरिएको उल्लेख गर्दै हटाउनुपर्ने बताइन्।
'यो विधेयक लेख्ने पनि पुरूष नै हो कि जस्तो लाग्यो। हरेक ठाउँमा वेश्यावृत्ति भन्ने शब्द आएको छ। त्यो हटाउन आग्रह गर्दछु,' रानामगरले भनिन्।
उनले आफूमाथि लागेको आरोपबारे विगतमा पार्टी सभापति रवि लामिछानेले पनि प्रतिरक्षा गरेको उल्लेख गर्दै पछिल्लो समय आदिवासी महिलाहरूले नै गरेको टिप्पणीले दु:ख लागेको बताइन्।
'आज गरिमामय सदनमा नियमापत्ति गर्दा हाम्रा महिला साथीहरूले 'वेश्या र चाइल्ड ट्राफिकर' भनेर सामाजिक सञ्जालमा लेखेका छन्,' रानामगरले भनिन्, 'मलाई दु:ख लागेको छ। च्यालेन्ज गर्छु - मैले चाहने हो भने हजारौं जनालाई जेल लैजान सक्छु। तर म गर्दिनँ। म राज्यको एक पैसा पनि मेरो नाममा खर्च गर्न चाहन्नँ।'
उनले आफूलाई लगाइएको आरोप पुष्टि गर्न चुनौती दिइन्।
'प्रमाणित गरेर देखाउनुहोस्। नभए यसरी मान्छेलाई झूटो आरोप लाउन पाइँदैन,' रानामगरले भनिन्, 'यो सभालाई म निरिह देखिराखेको छु, मलाई कति पीडा भएको छ, मलाई नै थाहा छ।'
उनले श्रम संस्कृति पार्टीका दलका नेता हर्क साम्पाङलाई सम्मान गर्ने उल्लेख गर्दै आफू ढुंगा बोक्न समेत गएको बताइन्। साथै आफ्नो पार्टीका कार्यकर्तालाई सम्झाउन पनि आग्रह गरिन्।
