९ दिनसम्म केन्द्रीय कार्यालय सानेपामा चलेको नेपाली कांग्रेसको केन्द्रीय कार्यसमिति बैठक १५ औं महाधिवेशन पूर्वनिर्धारित कार्यतालिकाअनुसार असोज १६ देखि १९ गतेसम्म नै गर्ने निष्कर्षसहित सम्पन्न भएको छ।
केन्द्रीय समिति बैठकमा सम्बोधन गर्दै सभापति गगन थापाले पूर्वनिर्धारित कार्यतालिकाअनुसार नै महाधिवेशन गरिने बताए।
पार्टीका वडासहित तल्ला तहका अधिवेशन कार्यतालिका भने केही हेरफेर हुने भएको छ।
सभापति थापाले मंगलबारदेखि नै अधिवेशनका प्रक्रिया सुरू हुने जानकारी दिए।
प्रेमबहादुर खड्का संयोजक रहेको केन्द्रीय निर्वाचन समितिले सभापति थापाको उपस्थितिमा आज दिउँसो २ बजे सानेपामा निर्वाचन अधिकृतहरूलाई प्रशिक्षण दिने भएको छ।
असोज १६ देखि १९ गतेसम्म हुन गइरहेको १५ औं केन्द्रीय महाधिवेशनअन्तर्गत विभिन्न जिल्लाहरुमा निर्वाचन सम्पन्न गर्न तोकिएका निर्वाचन अधिकृतहरूलाई प्रशिक्षण दिन लागिएको हो। कांग्रेसले कानुनी पृष्ठभूमि रहेकाहरूलाई निर्वाचन अधिकृत बनाएको छ।
सभापति थापाले पार्टीभित्रका सबै पक्ष र विचार समूहलाई १५ औं महाधिवेशनमा लैजाने प्रयास गरेका छन्।
‘नेताहरूसँग अझै केही दिन म संवादको प्रयास गर्छु,’ उनले सोमबार केन्द्रीय समिति बैठकमा भने, ‘केन्द्रीय महाधिवेशन पूर्वनिर्धारित मितिमै हुन्छ। हामी निवर्तमान सभापति शेरबहादुर देउवालाई असोज १६ गते हुने महाधिवेशन उद्घाटन सत्रमा बोलाउँछौं।’
उनले महाधिवेशन निष्पक्ष र पारदर्शी रूपमा गरिने प्रतिबद्धता जनाउँदै क्रियाशील छानबिनलगायत विभिन्न समितिहरूमा विशेष महाधिवेशनमा सहभागी नरहेकाहरूलाई पनि समावेश गरेर जान सकिने बताएका छन्।
कांग्रेसमा करिब ८ लाख क्रियाशील सदस्य छन्।
सभापति थापाले साउन २९ देखि ३१ गतेसम्म संस्थापनइतर पक्षले राखेको भेलामा ८ जना जिल्ला सभापति र केही क्षेत्रीय सभापति पनि सहभागी रहेको पाइएको भन्दै यस्ता भेलाहरूमा सहभागी रहने विगतकै अभ्यास रहेको र कतिपय अवस्थामा आफूले पनि यस्ता भेला गरेको उल्लेख गरेका थिए।
तर तोकिएको समयमा जिल्ला वा क्षेत्रीय अधिवेशन गराउँदिनँ भनेर कसैले भनेमा उक्त नेताको जिम्मेवारी 'खोसिने' सभापति थापाको भनाइ थियो। क्रियाशील सदस्यता अद्यावधिकका बेला पनि अद्यावधिक कार्यमा अहसयोग गर्ने कतिपय वडाध्यक्ष र क्षेत्रीय सभापतिहरूको जिम्मेवारी कार्यसमितिकै अर्को व्यक्तिलाई तोकेर क्रियाशील अद्यावधिक गराइएको थियो।
‘भेलाहरूमा सहभागी हुन पाइन्छ, कांग्रेसमा भेला हुनु परम्पराजस्तै हो, मैले पनि कतिपय भेला गरेको थिएँ। तर पार्टीको निर्णयअनुसार तोकिएको कार्यतालिका कार्यान्वयन गर्दिनँ, अधिवेशन गराउन सक्दिनँ भनेर कोही साथीले भन्नुहुन्छ भने त्यहाँ अर्को साथीलाई जिम्मेवारी दिइन्छ, अधिवेशन गराइन्छ,’ उनले भने।
सभापति थापाले पार्टीलाई एकताबद्ध बनाउन प्रयास गरिराखेको बताएका थिए।
उनले यस कार्यमा निवर्तमान सभापति पूर्णबहादुर खड्का र नेता शेखर कोइरालासँग पनि पटक पटक संवाद भएको र उनीहरूले पार्टी एकताकै पक्षमा भूमिका खेल्दै आएको पनि केन्द्रीय समिति बैठकमा जानकारी गराएका थिए।
-ink-1786266667.jpeg)
