राष्ट्रिय स्वतन्त्र पार्टी (रास्वपा) की सचेतक क्रान्तिशिखा धितालले रोल्पाका विभिन्न स्थानमा बाढी र पहिरोका कारण ठूलो जनधनको क्षति भएको भन्दै सरकारको गम्भीर ध्यानाकर्षण गराएकी छन्।
मंगलबार प्रतिनिधिसभा बैठकको आकस्मिक समयमा बोल्दै सांसद धितालले रोल्पामा बाढी र पहिरोमा परी हालसम्म १७ जनाको ज्यान गइसकेको, कयौं घाइते र बेपत्ता भएको दुखद अवस्थाबारे सदनलाई जानकारी गराइन्।
'कल्पना गरौं त, आज राति सुतिसकेपछि भोलि बिहान उठ्न पाइन्छ कि पाइन्न भन्ने भय बोकेर सुत्नुपर्दा त्यो निद्रा कति ठूलो यातना हुन्छ होला,' संसदमा रोल्पाली नागरिकको त्रास र पीडा पोख्दै उनले भनिन्, 'हामी त कल्पना गर्दा पनि तर्सिन्छौं। रोल्पाका नागरिक आज यही त्रासमा तड्पेर बाँचिरहेका छन्। यसतर्फ सम्मानित सदन र सरकारको तुरुन्त ध्यान जाओस्।'
सांसद धितालले रोल्पाका थवाङ, सुनछहरी र लुङ्ग्रीबाट निरन्तर दुखद खबरहरू आइरहेको भन्दै मानिसको अमूल्य ज्यान तथ्यांक वा अंकमा मात्र सीमित भइरहेकोप्रति चिन्ता व्यक्त गरिन्।
केही महिनाअघि रोल्पामा भएको जिप दुर्घटनामा एउटै गाउँका १९ जनाको ज्यान गएको घटना स्मरण गर्दै उनले थपिन्, 'हामी तथ्यांकमा यति जनाको ज्यान गयो भनेर गन्न सक्छौं, तर काख रित्तिँदा वा जीवनसाथी गुमाउँदाको पीडा कुनै राहत वा क्षतिपूर्तिले भर्न सक्दैन।'
विपदको समयमा राहत र उद्धारभन्दा राज्यको उपस्थिति र सहानुभूति महत्त्वपूर्ण हुने उनको भनाइ थियो।
'नागरिकको दुःखमा राज्य देखिनुपर्छ। बाढी-पहिरो आएपछि राहत बाँड्ने मात्र होइन, विपद आउनुअघि नै नागरिकलाई सुरक्षित बनाउनेतर्फ राज्यका संयन्त्रहरू चनाखो हुनुपर्छ,' उनले भनिन्।
'परिवर्तनको इतिहास बोकेको रोल्पा अझै अन्धकारमा'
१० वर्षे सशस्त्र द्वन्द्वको भुक्तभोगी समेत रहेकी सांसद धितालले रोल्पाले इतिहासदेखि नै निरन्तर संकट बेहोर्दै आएको बताइन्।
परिवर्तनको सपना बोकेको रोल्पा नेपालकै शक्तिशाली र समृद्ध जिल्ला बन्नुपर्ने भए पनि सामान्य आधारभूत आवश्यकताका लागि अझै नेता गुहार्नुपर्ने विडम्बना रहेको उनले उल्लेख गरिन्।
'सदरमुकाममै थोरै हावा चल्दा बिजुली जान्छ र रोल्पा अन्धकार बन्छ। धेरै ठाउँमा अझै बिजुली, नेटवर्क, सडक र स्वास्थ्य सेवा पुग्न सकेको छैन,' उनले संसदमा भनिन्, 'थवाङ विद्रोह र परिवर्तनको इतिहास बोकेको ठाउँ हो। त्यो वार म्युजियम बन्नुपर्ने र विश्वभरका पर्यटक पुग्नुपर्ने ठाउँ हो, तर आज थवाङ जाँदा इतिहासको गौरवभन्दा मृत्युको खाडलमा खसिने हो कि भन्ने डर हुन्छ।'
रोल्पा वर्षाको त्रासमा रहेको र भोलि अन्य जिल्ला पनि यही अवस्थामा पुग्न सक्ने चेतावनी दिँदै सांसद धितालले बाढी-पहिरो प्रभावित क्षेत्रमा तत्काल उद्धार, राहत र दीर्घकालीन सुरक्षाको व्यवस्था मिलाउन सरकारसँग जोडदार माग गरिन्।
