राष्ट्रिय स्वतन्त्र पार्टी (रास्वपा) को केन्द्रीय समिति बैठक भदौ ५ गते बस्ने भएको छ।
पार्टी कार्यालय वनस्थलीमा बिहान ११ बजे बैठक बस्ने भएको हो।
महामन्त्री विपिन कुमार आचार्यद्वारा जारी सूचना अनुसार उक्त बैठकमा आगामी स्थानीय तह निर्वाचनका लागि 'उम्मेदवार छनोट रूपरेखा २०८३' अनुमोदन गर्ने र 'राइट टु रिकल' (जनप्रतिनिधि फिर्ता बोलाउने अधिकार) सम्बन्धी दस्तावेज निर्माण गर्नेबारे छलफल हुनेछ।
त्यसैगरी साङ्गठनिक व्यवस्थापनअन्तर्गत केन्द्रीय समिति सदस्य, पदाधिकारी, सचिवालय सदस्य, विभागीय प्रमुखहरू र उम्मेदवार छनोट समितिका सदस्यहरूको मनोनयन गर्ने कार्यसूची रहेको छ।
बैठकले स्थानीय तहमा 'उम्मेदवार छनोट रूपरेखा' सम्बन्धी अभिमुखीकरण तथा प्रशिक्षण कार्यक्रम चलाउने, पार्टीको मुखपत्रका रूपमा 'स्वतन्त्र' नामक मासिक डिजिटल पत्रिका प्रकाशन गर्ने र विविध समसामयिक विषयमा निर्णय लिनेछ।
