बागमती प्रदेशको नयाँ मुख्यमन्त्रीमा नेकपा एमालेका सांसद किरण थापा मगरले दाबी पेस गरेका छन्।
उनले आज एमाले, नेकपा र राप्रपाको समर्थनमा मुख्यमन्त्रीमा दाबी पेस गरेका हुन्।
बहुमतका लागि ५३ सांसद चाहिने भए पनि उनले एमाले, नेकपा र राप्रपासहित ६३ जना प्रदेश सभा सदस्यको समर्थनसहित दाबी पेस गरेको एमाले सचिव महेश बस्नेतको भनाइ छ।
किरणले आज प्रदेश प्रमुख दीपकप्रसाद देवकोटासमक्ष दाबी पेस गरेका हुन्। यसअघि बागमतीमा एमालेको समर्थनमा कांग्रेस संसदीय दल नेता ईन्द्रबहादुर बानियाँ नेतृत्वमा सरकार थियो। एमालेले समर्थन फिर्ता लिएपछि मुख्यमन्त्रीबाट बानियाँले राजीनामा दिएका थिए।
बागमती सरकार बनाउन समर्थन गरेपछि राप्रपाभित्र भने विवाद देखिएको छ। यहाँ राप्रपाका १२ जना सांसद छन्। राप्रपाले प्रदेश सरकार बनाउने र गिराउने खेलमा नलाग्ने बताएको थियो।
यसअघि मुख्यमन्त्री बानियाँले विश्वास मत लिन खोज्दा तटस्थ बस्ने राप्रपाले निर्णय गरेको थियो।
