विपक्षी दल नेपाली कम्युनिस्ट पार्टी (नेकपा)का सांसद नरबहादुर विष्टले अहिलेको सरकारले ५ महिनामै गरेको 'अचाक्ली' पुरानाहरूले ३५ वर्षमा पनि नगरेको दाबी गरेका छन्।
राष्ट्रिय सभाको बुधबार बसेको बैठकमा बोल्दै सांसद विष्टले मन्त्री र मन्त्रीका स्वकीय सचिवहरूले राज्यकोषको दोहन गरेको आरोप लगाएका हुन्।
'सुदूरपश्चिमको दार्चुलाबाट बैतडी आउँदा रूघाखोकी लागेछ। हेलिकप्टर चार्टर्ड गरेर काठमाडौं आउँदा १६ लाख खर्च गर्नुभएछ,' उनले भने, 'अस्ती गृहमन्त्रीको स्वकीय सचिव स्काइ भ्यान बुक गरेर विराटनगर जानुभएछ ८ लाख खर्च गर्नुभएछ। हामीले त त्यो गरेका थिएनौं। त्यति अचाक्ली त गरेका थिएनौं।'
सरकारले सचिव र सहसचिवहरूलाई थन्क्याएर मन्त्रीको सचिवालयबाट देश चलाउन खोजेको पनि उनको आरोप छ।
'४ महिनामा अवकास हुन लागेका सहसचिवहरूलाई सरूवा गरी सामान्य प्रशासन मन्त्रालयमा थुनेर राखिएको छ। दर्जनौं सहसचिवहरू गृह मन्त्रालयमा बेवारिसे राखिएको छ। कर्मचारीतन्त्रमाथि धम्काएर थर्काएर मन्त्रीका सचिवालयबाट शासन चलाउन खोज्ने तरिकाले यो देश कस्तो बन्ला?,' उनले भने।
उनले पहिलेका मन्त्रीहरूले अहिलेकाले जस्तो सचिवालयमा सचिवस्तरको कर्मचारी नियुक्त नगरेको दाबी गरे।
'मन्त्रीहरूले सचिवस्तरमा कर्मचारी नियुक्त गर्नुभाछ। विगतमा हाम्रा मन्त्रीहरूले ३/४ जना उपसचिव लेबलका स्वकीय सचिव नियुक्त गरेका थिए। प्रधानमन्त्रीको कार्यालयमा मन्त्रीसरहको सुविधा दिनेगरी २७ जना नियुक्ति गर्नुभो। हामीले त्यसो गरेका थिएनौं। मन्त्रीसरहको सुविधा दिएर कुनै पनि प्रधानमन्त्रीले सल्लाहकार नियुक्त गरेको थिएन। यो पनि नयाँ गर्नुभयो,' उनले भने।
५ महिनासम्म केही गर्न नसकेर अहिलेको सरकारले ३५ वर्षलाई गाली गरेर बसेको सांसद विष्टको आरोप छ।
'३५ वर्षलाई मात्रै गाली गरेर देश चल्न सक्दैन। ३६ वर्ष हुँदैमा अब बाउ मान्दिन भन्न मिल्छ? बाउ आमाको अपमान गर्ने? बाउ आमालाई गाली गरेर देश बन्छ?,' उनले भने।
