राष्ट्रिय स्वतन्त्र पार्टीका सांसद एवं महामन्त्री विपिन आचार्यले यो पटकको स्थानीय निर्वाचनमा संसारभर भएका नेपालीले भोट हाल्न पाउने व्यवस्था गर्न सरकारको ध्यानाकर्षण गराएका छन्।
बुधबार प्रतिनिधि सभामा बोल्दै उनले समय छँदै कानुनी तथा प्राविधिक पक्षमा काम सुरू गर्न सरकारलाई आग्रह गरेका छन्।
‘हामी चाहन्छौँ यो पटकको स्थानीय निर्वाचनमा संसारभरका प्रवासी नेपालीहरूले पनि भोट हाल्न पाऊन्,’ उनले संसदमा बोल्दै भने, ‘त्यसका लागि जे-जे कानुनी उपायहरू गर्नुपर्ने छ, त्यो गर्न सुरू गरौँ। र त्यसको प्राविधिक पाटो अझ बढी पेचिलो हुन्छ, त्यसमा काम गरौँ।’
'नोट चल्ने, भोट नचल्ने' प्रवृत्तिको अन्त्य गरिनुपर्छ भनेर आफ्नो पार्टीले पनि कुरा उठाउँदै आएको उनले बताए।
आफ्नो पार्टीले स्थानीय निर्वाचनका लागि क्यान्डिडेट क्लब खोलेको र उम्मेदवार छनोट प्रक्रियामा नेपालभित्रका पार्टी सदस्यले मात्र होइन, संसारभरका पार्टी सदस्यहरूले पनि भोट हाल्न मिल्ने व्यवस्था गरेको पनि उनले उदाहरण सुनाए।
'नोट चल्ने, भोट नचल्ने' प्रवृत्तिको अन्त्य गरिनुपर्छ भनेर पार्टीले जहिले पनि भनेको छ। त्यसैले म सभामुखमार्फत नेपाल सरकारको ध्यानाकर्षण गराउन चाहन्छु,’ उनले भने, ‘यो पटकको स्थानीय निर्वाचनमा संसारभर भएका नेपालीले भोट हाल्नका लागि जे-जे गरिनुपर्छ, त्यसलाई प्रायोरिटीमा राखेर आजैबाट त्यसको काम सुरू गरियोस्। किनकि यो गाह्रो विषय हो, त्यसका लागि तयारी धेरै चाहिन्छ। तयारी गर्नका लागि म आग्रह गर्दछुf।’
