राष्ट्रिय स्वतन्त्र पार्टीका सांसद खगेन्द्र सुनारले बिचौलियाहरूले प्रहरीको हेडक्वार्टर कब्जा गरेका आरोप लगाएका छन्।
बिहीबार बसेको सार्वजनिक लेखा समितिको बैठकमा उनले प्रहरीको स्रोत–साधन खरिद प्रक्रियामा अनियमितता भइरहेको आरोप लगाउँदै निश्चित बिचौलियाले प्रहरी प्रधान कार्यालय नै कब्जा गरेको दाबी गरेका हुन्।
प्रहरीले खरिद प्रक्रियामा भएका भनिएका बदमासी सम्बन्धी माग गरिएका कागजात अझै उपलब्ध गराए–नगराएकोबारे समितिमा जानकारी गराउन पनि उनले समिति सभापतिलाई आग्रह गरे।
समितिको यसअघिको बैठकले १५ दिनभित्र प्रहरीको स्रोत–साधन खरिद सम्बन्धी कागजात उपलब्ध गराउन माग गरेको थियो । सुनारले पछिल्लो समयमा पनि प्रहरीले करोडौँ रुपैयाँका टेण्डर आह्वान गरेको भन्दै खरिद प्रक्रियामाथि प्रश्न उठाए। यसअघि समितिमा आफूले उठाएको प्रश्नमा आफू अडिग रहेको बताउँदै उनले आफ्नो अभिव्यक्तिबाट कसैको मानमर्दन भएको भएमा अदालत जान चुनौती दिए। आफूले उठाएका प्रश्नको जबाफ दिन र कानुनी प्रक्रियामा उपस्थित हुन तयार रहेको उनको भनाइ छ।
उनले भने, ‘हामीले १५ दिनभित्रमा त्यो प्रहरीको स्रोत साधन खरिदमा भएका बदमासीका बारेमा हामीले डकुमेन्ट मागेका थियौँ, त्यो आयो कि आएन? फेरि अझै बीचमा प्रहरीले करोडौँको टेन्डर आह्वान गरेको छ। निश्चित बिचौलियाहरूले प्रहरीको हेडक्वार्टर कब्जा गरेका छन्। अस्ति गरेको प्रश्नमा म अडिग छु, मजबुत छु। कहीँकतै कोही साथीहरूलाई मेरो मानमर्दन भयो भन्ने लाग्छ भने यहाँ उता पट्टि अदालत छ, गएर मुद्दा हाल्नुहोला। कठघरामा म उभिएर जवाफ दिनलाई म तयार छु। तर एउटा सार्वभौम एउटा चाहिँ समितिमा आएर टोपी भुइँंमा राखेर जुहारी खेल्न पाइँदैन। सरकारको मानमर्दन गर्न पाइँदैन।’
उनले बैठकमा सांसदहरूबीच हुने बहस र व्यवहारप्रति पनि आपत्ति जनाए।
समितिको बैठकमा कुनै विषय नियमावली विपरीत भएमा सभापतिले तत्काल रूलिङ गर्नुपर्ने तर एक सांसदले अर्को सांसदलाई धम्क्याउने, घेराबन्दी गर्ने वा हतोत्साहित गर्ने व्यवहार स्वीकार्य नहुने बताए।
जनताबाट निर्वाचित प्रत्येक सांसदले समितिमा आफ्ना प्रश्न राख्ने सार्वभौम अधिकार राख्ने उनको भनाइ छ।
सामान्य ढंगले प्रश्न गरेर भ्रष्टाचारको गहिराइमा पुग्न नसकिने भन्दै उनले समितिमा उठाइने प्रश्न निर्मम, गम्भीर र गहिरो हुनुपर्ने बताए। समितिमा रहँदासम्म भ्रष्टाचार र खरिद प्रक्रिया सम्बन्धी विषयमा आफूले कडा प्रश्न उठाइरहने सुनारको भनाइ छ।
उनले भने, ‘पछिल्लो बैठकमा जे जे भयो, त्यो जनताले सबै ठाउँबाट देखिरहनुभएको छ। मेरो सभापतिज्यूलाई मेरो एउटा गम्भीर ध्यानाकर्षण के छ भने समितिमा भएका छलफलहरूमा कहीँकतै त्यो नियम नियमावली विपरीत छ भने सभापतिज्यूले रूलिङ गर्नुहोला, भन्नुहोला। तर एउटा सांसदले अर्को सांसदलाई हुर्मत लिने, धम्क्याउने, घेराबन्दी गर्ने काम त्यो मान्य छैन। बोल्दै गरेको वक्ता पनि त्यहीँ निर्वाचित सांसद हो, जो जनताबाट अनुमोदित भएर आएको मान्छे हो। यहाँ प्रत्येक सांसद सार्वभौम छ। त्यो भन्दै गर्दा कहीँकतै नियमापत्ति भयो भने सार्वजनिक लेखा समितिको जुन नियम नियमावली छ त्यो देखाउने, नियमापत्ति गर्ने र सभापतिले रूलिङ गर्ने। ताकि यसो र त्यसो भन्ने छैन, हुँदैन, त्यो मान्य छैन, त्यो स्वीकार्य छैन। फेरि घेराबन्दी गरिन्छ भने खगेन्द्र सुनार स्वीकार्य छ, तयार छ। कहाँको कठघरामा उभिनुपर्छ, प्रत्येक मेरो प्रश्नको मसँग जबाफ छ। त्यो फेस गर्न खगेन्द्र सुनार तयार छ।’
उनले अगाडि भने, ‘शैली मिलेन भनिएको छ, धेरै ठाउँमा। पहिलेको शैलीमा भ्रष्टाचारको छानबिन हुँदैन है। ‘भन भन भाइ यो, भन कति खाइयो, भन छिटो चाहियो, लौ छिटो भन, अत्तो यता भन।’ पहिलेको शैलीमा प्रश्न हुँदैन। प्रश्न निर्मम हुन्छ, गम्भीर हुन्छ, गहिरो हुन्छ, तल्लैबाट हुन्छ। प्रश्नकर्ता वक्ता अस्वाभाविक, अमर्यादित लाग्यो भने समितिको सभापतिले आजैको मितिबाट घर पठाइदिनुहोला, म दैलेखको नाइट बस चढ्न तयार छु। तर यो ठाउँमा बस्ने बेलासम्म प्रश्न निर्मम हुन्छ, त्यो गहिरो हुन्छ। त्यो कसैको चाकडी, कोही कसैलाई भन्नुपर्ने, केही कसै गर्नुपर्ने छ भने सम्बन्धित मान्यज्यूले यसरी हो नि बोल्ने भनेर मजाले बोल्न सक्नुहुनेछ। त्यो सार्वभौमिक अधिकार सबैलाई छ।’
उनले अनियमितता र भ्रष्टाचार विरूद्ध समिति निर्मम बन्नुपर्ने बताए।
समितिको यसअघिको बैठकमा सुनार र प्रहरी महानिरीक्षक दानबहादुर कार्कीबीच प्रहरीको पोशाक खरिद प्रक्रियामा अनियमितता भएको विषयमा विवाद भएको थियो।
उक्त विषयमा सांसद सुनारले बिहीबारको बैठकमा प्रस्टीकरण दिएका हुन्। –न्युज एजेन्सी नेपाल
