बागमती प्रदेशका नवनियुक्त मुख्यमन्त्री किरण थापा मगरले आज प्रदेश सभामा विश्वास मत लिने भएका छन्।
दिउँसो १ बजे बस्ने प्रदेश सभा बैठकमा उनले विश्वास मतको प्रस्ताव राख्नेछन्।
एमाले सांसद रहेका उनी एमाले, नेकपा र राप्रपाको समर्थनमा मुख्यमन्त्री नियुक्त भएका थिए। तर उनलाई समर्थनसहितको पत्र दिएका राप्रपा संसदीय दल नेता उद्धव थापालाई राप्रपाले पार्टीबाट निकालिसकेको छ।
पार्टी केन्द्रको निर्देशनविपरीत मुख्यमन्त्रीलाई समर्थन दिएको उनीमाथि आरोप छ।
यस्तै बागमती सरकारमा राप्रपाका ३ जना सांसद मन्त्री छन्। यहाँ राप्रपाका १२ सांसद छन्।
राप्रपाले सरकारमा सहभागी मन्त्रीहरूलाई पनि स्पष्टीकरण सोधेको छ। सुरूमा १२ घन्टा र पछि पुन: १२ घन्टा थपेर मन्त्रीहरूलाई स्पष्टीकरण सोधिएको थियो।
आज मुख्यमन्त्रीले विश्वास मत लिने भए पनि राप्रपाले ह्विप जारी गरेर तटस्थ बस्न वा अनुपस्थित रहन भनेको छ।
‘राप्रपाले भदौ ८ गतेका लागि निर्धारित बागमती प्रदेशका मुख्यमन्त्रीले लिने विश्वासको मतमा विपक्षमा मतदान गर्न, तटस्थ रहन वा अनुपस्थित रहन आफ्ना प्रदेशसभाका सांसदहरुलाई ह्विप जारी गरेको छ,’ प्रवक्ता मोहन श्रेष्ठले भने, ‘बागमती प्रदेश सभामा राप्रपाकी प्रमुख सचेतक कुमारी तामाङद्वारा जारी ह्विप पार्टीका प्रदेशसभाका सबै सांसदहरूलाई पठाइएको छ।’
राप्रपाले आफ्नै मन्त्रीहरू सहभागी सरकारलाई विश्वास मत नदिन भनेको छ।
राप्रपाका ३ सांसद मन्त्री रहेकोले फ्लोर क्रस भई मुख्यमन्त्रीका पक्षमा राप्रपाका केही सांसदहरूले मतदान गर्ने तयारीसमेत रहेको बताइएको छ। स्पष्टीकरण सोधिएका मन्त्रीहरूमाथि राप्रपाले कारबाही गर्न सक्ने सम्भावना पनि छ।
एमाले र नेकपालाई यहाँ बहुमत पुर्याउन २ सांसद आवश्यक पर्ने भएपछि राप्रपा केन्द्रको असहमतिबीच पनि राप्रपा बागमती प्रदेश सभा सदस्यहरूको साथ लिएको थियो।
