बागमती प्रदेशका मुख्यमन्त्री किरण थापा मगरको नियुक्तिविरूद्ध परेको रिटमा कारण देखाऊ आदेश जारी भएको छ।
उच्च अदालत पाटन हेटौंडा इजलासकी न्यायाधीश बबिता उप्रेतीको एकल इजलासले आज कारण देखाऊ आदेश दिएको हो।
निवेदन माग बमोजिमको आदेश जारी हुनुपर्ने हो, होइन लिखित जबाफ पेस गर्न पनि आदेशमा भनिएको छ।
अन्तरिम आदेश जारी गर्ने कि नगर्ने भन्ने विषयमा भने भदौ १० गते दुवै पक्षसँग छलफल हुनेछ।
राप्रपा सांसद कुमारी तामाङले मुख्यमन्त्री नियुक्तिविरूद्ध अन्तरिम आदेश माग गरेकी थिइन्।
‘निवेदकले अन्तरिम आदेश समेतको माग गरेको सम्बन्धमा विचार गर्दा निवेदकले दाबी लिएको विवादका विषयमा दुवै पक्ष राखी छलफल गरी आदेश गर्न उपयुक्त हुने देखिन आएकोले सो प्रयोजनार्थ भदौ १० गतेका दिन छलफलका लागि पेसी तोकी छलफल पेसीमा उपस्थित हुन आउँदा आफूसँग रहे भएका थप प्रमाण कागजातहरू केही भए सोसमेत लिई आउनु भनी दुवै पक्षलाई जानकारी गराई पेसीको सूचना दिई नियमानुसार गर्नुहोला,’ आदेशमा भनिएको छ।
मुख्यमन्त्रीले आज प्रदेश सभाबाट विश्वास मत लिने तयारी गरेका छन्।
यहाँ मुख्यमन्त्रीलाई समर्थन र सरकारमा सहभागिताबारे राप्रपाभित्र विवाद छ।
राप्रपाले संसदीय दल नेता उद्धव थापालाई पदमुक्त गरी उपसभामुखलाई पत्रसमेत दिइसकेको छ।
सरकारमा राप्रपाका ३ जना मन्त्री छन्। राप्रपा सांसदलाई बेग्लाबेग्लै ह्विप जारी भएको छ। पार्टी केन्द्रले तटस्थ बस्न वा अनुपस्थित रहन भन्दै मुख्यमन्त्रीलाई विश्वास मत नदिन भनेको छ।
तर सरकारमा सहभागी मन्त्रीहरू र केही सांसद विश्वास मत दिने पक्षमा देखिएका छन्।
