नेपाली कांग्रेसकी केन्द्रीय सदस्य कुसुम थापाले पूर्वऊर्जामन्त्रीसमेत रहेका पार्टीका नेता दीपक खड्कालाई सबै मिलाएको छु भन्दै नहिँड्न आग्रह गरेकी छन्।
उनले खड्कामाथि आरोप लगाउँदै 'अदालतका कर्मचारीदेखि श्रीमानसम्म मिलाएको' उल्लेख गरेकी हुन्। उनले यो कुरा आज सामाजिक सञ्जाल फेसबुकमा पोस्ट गरेकी छन्।
उनले न्यायलयको गरिमा जोगाउन पनि आग्रह गरेकी छन्।
थापाले लगाएका आरोपबारे खड्कासँग बुझ्न खोज्दा सम्पर्क हुन सकेन। खड्कालाई दुई पटक टेलिफोन गरिएकोमा सम्पर्क हुन नसकेको हो।
कांग्रेस १५ औं महाधिवेशन रोक्न माग गर्दै निवर्तमान सभापति शेरबहादुर देउवा र निवर्तमान कार्यवाहक सभापति पूर्णबहादुर खड्काले वारेसमार्फत् सर्वोच्च अदालतमा दिएको रिट आज दर्ता भई भदौ ११ गतेका लागि पेसी तोकिएको छ।
यस्तो छ थापाको भनाइ-
दीपक खड्का दाइ, जय नेपाल।
राजनीतिक लडाइँ राजनीतिक तरिकाले लड्नुपर्छ र कानुनी लडाइँ कानुनी तरिकाले। तपाईंहरूले राजनीतिक कुरालाई बारम्बार कानुनी बनाउनुभएको छ, त्यो पनि केही छैन, हामी त्यो पनि सामना गर्छौं तर केही समययता तपाईंले "पहिला म जेलमा भएको बेला परेकाले उनीहरूले आधिकारिकता पाएका हुन्, नत्र म मेरो मुद्दाजस्तै सेटिङ गर्थेँ। अब योपालि त्यस्तो हुन नदिन मिलाइसकैँ, फलानी-फलानो श्रीमानलाई राति भेटेको छु, उनीहरूका मान्छे भेटिसकेँ, स्टे पनि आउँछ, आधिकारिकता पनि आउँछ" भन्नुभएको रहेछ कहि कतै।
दाइ हार्दिक अनुरोध गर्दछु, थाहा छ तपाईंसँग धेरै पैसा छ भन्ने एक वर्षअघि जेन-जी (Gen-Z) आन्दोलनकै बेलाको भिडियोमा देख्यौँ हामीले पनि। तर छ भन्दैमा अदालतका कर्मचारीदेखि श्रीमानसम्म मिलाएको छु भन्दै नहिँड्नुहोला। तपाईंको कारणले सोझा मान्छेकै न्यायालयप्रतिको विश्वसनीयता घट्छ। न्यायालयको गरिमा जोगाउने जिम्मा तपाईं-हामी सबैको हो।
