जनता समाजवादी पार्टी जसपा नेपालले लुम्बिनी प्रदेशका सांसदलाई दोस्रो पटक स्पष्टीकरण माग गरेको छ।
जसपाका महासचिव डा. सुरेन्द्र कुमार झा द्वारा सोधिएको स्पष्टीकरणमा प्रदेश सांसदहरू सन्तोष कुमार पाण्डे, हेमा बेलवासे र भण्डारी लाल अहिरलाई २४ घण्टाभित्र पुनः स्पष्टीकरण पेस गर्न निर्देशन दिइएको छ।
पार्टी केन्द्रको निर्देशन विपरीत लुम्बिनी प्रदेश सरकारलाई समर्थन गरेको भन्दै जसपाले सांसदलाई यसअघि नै सात दिन भित्र स्पष्टीकरण पेस गर्ने निर्देशन गरेको थियो।
पार्टीको निर्देशनपछि सांसदहरूले पेस गरेको स्पष्टीकरण अध्ययन गर्दा पार्टीको नीति, निर्णय तथा निर्देशनको भावनासँग मेल नखाने तथा उठाइएका प्रश्नहरूको चित्तबुझ्दो र सन्तोषजनक जवाफ प्राप्त नभएको भन्दै पुनः स्पष्टीकरण पेस गर्न निर्देश गरेको हो।
जसपाले लुम्बिनी प्रदेश सरकारलाई समर्थन नगर्ने तथा सरकारको विपक्षमा मतदान गर्न २०८३ साल भाद्र १ गते पत्रमार्फत स्पष्ट निर्देशन जारी गरिए पनि जसपा लुम्बिनीका सांसदहरूले पार्टी निर्देशन विपरीत प्रदेश सरकारको पक्षमा मतदान गरेका थिए।
पार्टीको निर्देशन अवज्ञा गरी लुम्बिनी प्रदेश सरकारको पक्षमा मतदान गरेको भन्दै जसपाले लुम्बिनीका सांसदहरूलाई पार्टी अनुशासनको कारबाही गर्न लागेको हो।
महासचिव झा द्वारा सोधिएको स्पष्टीकरणमा पार्टीको नीति, निर्णय तथा निर्देशनको प्रतिकूल हुने गरी पार्टी सदस्यले कार्य गर्न मिल्ने वा नमिल्ने सम्बन्धमा सांसदहरूको स्पष्ट धारणा के हो भनी सोधिएको छ।
त्यस्तै पार्टी निर्देशनको अवज्ञा गरी गरिएको उक्त कार्यलाई पार्टी विधान तथा प्रचलित निर्णयअनुसार कसरी लिनुपर्ने हो, सो सम्बन्धमा समेत आफ्नो स्पष्ट धारणा पेस गर्न भनिएको छ। २४ घण्टा भित्र पार्टी केन्द्रीय कार्यालयमा अनिवार्य रूपमा पुनः स्पष्टीकरण पेस नगरेमा वा पेस गरिएको स्पष्टीकरण चित्त बुझ्दो र सन्तोषजनक नभएमा पार्टी विधान तथा प्रचलित निर्णयबमोजिम आवश्यक अनुशासनात्मक कारबाहीको प्रक्रिया समेत अघि बढाइने जसपाले जनाएको छ।
