सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछानेले भोटेकोशी बाढीप्रभावितको राहत तथा उद्धारमा सरकारले सम्पूर्ण सामर्थ्य लगाउने विश्वास व्यक्त गरेका छन्।
प्रतिनिधिसभाको बुधबारको बैठकमा लामिछानेले प्रधानमन्त्री, गृहमन्त्री र स्वास्थ्य मन्त्री लगायतसँग आफू निरन्तर सम्पर्कमा रहेको बताए।
'मलाई विश्वास छ, सरकारले आफ्नो सम्पूर्ण सामर्थ्य लगाउनेछ। यति बेला नागरिकको ज्यान बचाउनु सबभन्दा महत्त्वपूर्ण कुरा भएकाले म सम्मानित सदनलाई प्रतिबद्धताका साथ भन्न चाहन्छु— सरकारले आफ्नो सम्पूर्ण तागत सबभन्दा पहिले नागरिकको रक्षा गर्नमा लगाउनेछ,' उनले भने।
उनले यस्तो कठिन परिस्थितिमा सबै सम्हालिएर अघि बढ्नुपर्नेमा जोड दिए।
राजनीतिक दलहरूसँग विशिष्ट संयन्त्र हुने भएकाले यस्ता विपदमा दलहरू पनि एकै ठाउँमा उभिनुपर्ने उनले बताए। साथै, २०७२ को भूकम्प बेला नेपालले प्रदर्शन गरेको उच्च राजनीतिक चरित्रलाई फेरि दोहोर्याउनुपर्ने आवश्यकता औंल्याए।
'हामी नेपालीहरू भावुक र सहयोगी मनका भएकाले विपद पर्दा स्वदेशमा मात्र नभई विदेशमा रहेका नेपालीहरूले पनि देशका लागि के गर्न सकिन्छ भनेर सधैं अग्रसर भई मद्दत गर्दै आउनुभएको छ। देशलाई घाउ लाग्दा विदेशमा रहेका नेपालीहरूले मलम पठाउन कहिल्यै छुटाउनुभएको छैन। यसपटक पनि उहाँहरूले पक्कै पनि देशका लागि मलमको जोहो गर्न मद्दत गर्नुहुनेछ भन्नेमा म विश्वस्त छु,' लामिछानेले थपे।
अहिलेको सरकार बलियो रहेको उल्लेख गर्दै उनले बलियो हुनुको मापन अब्बल ढंगले काम गरेर पुष्टि हुनुपर्ने बताए। साथै, विपद बेला हुने 'भिआइपी मुभमेन्ट' ले सुरक्षा चुनौती सिर्जना गर्नेतर्फ सबैलाई सचेत गराए।
'संसदको संख्याका आधारमा मात्र सरकार बलियो हुने होइन। आपत-विपत पर्दा सरकार कति द्रुत र प्रभावकारी ढंगले जनतासामु पुग्छ, त्यसका आधारमा सरकारको सामर्थ्य मापन हुन्छ। मलाई विश्वास छ, यो सरकारले आफूलाई अब्बल ढंगले अगाडि बढाउँदै नागरिकको सेवामा समर्पित गर्नेछ,' उनले भने, 'यस्ता विपद बेला भिआइपी मुभमेन्टले कहिलेकाहीँ सुरक्षाकर्मीहरूका लागि थप चुनौती सिर्जना गर्छ। त्यसैले अत्यन्त अत्यावश्यक अवस्थाबाहेक म आफै फिल्डमा जाने छैन; बरू सरकारलाई प्रभावकारी रूपमा काम गराउन भूमिका खेल्नेछु।'
'यदि कुनै कारणवश पुग्नै परेको खण्डमा पनि मेरो लागि कुनै किसिमको भिआइपी मुभमेन्ट वा सुरक्षा प्रबन्धको चिन्ता लिनुपर्ने छैन। मेरो दलका सांसदहरू जाँदा पनि सुरक्षाकर्मीहरूले त्यस्तो कुनै चिन्ता नलिई आफ्नो काम गरे हुन्छ, हामीलाई कतै पनि ध्यान दिनुपर्ने छैन,' उनले भने।
