नेपाल कम्युनिष्ट पार्टी (एमाले) ले भोटेकोशी र त्रिशूली नदीमा आएको भीषण बाढीबाट प्रभावित भएका सर्वसाधारणको अविलम्ब उद्धार, खोजी तथा तत्कालीन र दीर्घकालीन राहत प्याकेज घोषणा गर्न सरकारसँग माग गरेको छ।
च्यासलस्थित केन्द्रीय कार्यालयमा बुधबार बसेको केन्द्रीय सचिवालयको आकस्मिक बैठकले विपदमा परेका नागरिकको जीवनरक्षा गर्नु राज्यको पहिलो दायित्व भएको औंल्याएको छ।
एमालेले बाढीमा फसेकाहरूको तत्काल उद्धार, घाइतेको नि:शुल्क तथा प्रभावकारी उपचार र जोखिममा परेका मानिसहरूलाई सुरक्षित स्थानमा स्थानान्तरण र पुनस्थापना गर्न सरकारको ध्यानाकर्षण समेत गराएको छ।
सरकारले कुनै पनि बहानामा अलमल नगरी उद्धार कार्यमा तदारूकता देखाउनुपर्ने र द्रुत गतिमा आवश्यक राहत सामग्री प्रभावित क्षेत्रमा पुर्याउन एमालेले आग्रह गरेको छ।
साथै, एमालेले आफ्ना सम्पूर्ण नेता, कार्यकर्ता, जनसंगठनका सदस्य र जनप्रतिनिधिहरूलाई प्रभावित क्षेत्रमा तत्काल खोजी, उद्धार र राहत कार्यमा सक्रिय रूपमा जुट्न निर्देशन दिएको छ।
