नेकपा एमाले महासचिव शंकर पोखरेलले स्थानीय बासिन्दाले बनाएको योजना अनुसार एमाले नेता तथा कार्यकर्ताहरू उद्धार, राहत, पुनर्निर्माण तथा पुनर्स्थापनाको काममा खटिने बताएका छन्।
बाढी प्रभावित क्षेत्र नुवाकोटका विभिन्न स्थानमा स्थलगत निरीक्षणपछि पार्टीका जिल्ला नेता तथा कार्यकर्तासँग कुरा गर्दै महासचिव पोखरेलले विगतका ठूला प्राकृतिक विपत्तिमा पनि एमाले कार्यकर्ताहरूले श्रमदानमार्फत उद्धार, राहत र पुनर्निर्माणमा योगदान पुर्याएको स्मरण गराए।
यस पटक पनि एमाले पूर्ण रूपमा सोही कार्यमा खटिने उनले स्पष्ट पारे।
'तपाईंहरू योजना बनाउनुहोस् र कस्तो प्रकारको सीप भएका जनशक्ति चाहियो, त्यसको माग गर्नुहोस्। पार्टीले त्यसै अनुसार जनशक्ति पठाउँछ,' महासचिव पोखरेलले भने।
उनले आवश्यकताभन्दा बढी जनशक्ति आए फिर्ता पठाउनसमेत निर्देशन दिए।
'अनावश्यक भीडभाडले मूल काम प्रभावित हुन्छ। त्यसैले आवश्यकताभन्दा बढी भीडभाड नगर्नुहोस्,' पोखरेलले भने।
पोखरेलले उद्धार, राहत तथा बेपत्ताको खोजीका लागि स्थानीय जनताको साथ लिन पार्टी नेतृत्वलाई निर्देशन दिएका छन्।
'बेपत्ताहरूको खोजीमा लाग्नुहोस्, कोही भेटिएमा स्थानीय प्रशासनलाई खबर गर्नुहोस्,' पोखरेलले थपे, 'यी सबै कामका लागि स्थानीय, प्रदेश र संघीय सरकारसँग आवश्यक समन्वय गर्नुहोस्।'
संघीय सरकारबाट गर्नुपर्ने कामको सूची बनाएर पठाए पार्टी केन्द्रले त्यसको समन्वय गर्ने उनले बताए। कतिपय काम राज्यबाट र कतिपय स्थानीयवासीको श्रमदानबाट हुने भएकाले त्यसको सही पहिचान गरेर काममा लाग्न उनले सुझाएका छन्।
महासचिव पोखरेलले पार्टीका स्थानीय कमिटीहरूको काममा समन्वय गर्न र प्रदेश तथा केन्द्रमा नियमित रिपोर्टिङ गर्न एमाले नुवाकोट जिल्ला कमिटीलाई आग्रहसमेत गरे।
एमाले प्रचार तथा प्रकाशन विभागका प्रमुख निरज आचार्यका अनुसार सदरमुकाम विदुरमा केन्द्रीय सदस्य एवं नुवाकोट जिल्ला इन्चार्ज केशव पाण्डेले जिल्लामा बाढीले पुर्याएको क्षतिको विवरण महासचिवको टोलीसमक्ष प्रस्तुत गरेका थिए।
त्यस्तै, केन्द्रीय सदस्य तथा रसुवाका इन्चार्ज प्रेम तामाङले रसुवामा बाढीले गरेको क्षतिको जानकारी गराएका थिए।
महासचिव पोखरेल नेतृत्वको टोलीले बाढीले क्षतिग्रस्त बनाएको ढुंगे बजार, देवीघाट लगायतका स्थानको निरीक्षण गरेको छ। टोलीले स्थानीय अस्पताल पुगेर घाइतेहरूको स्वास्थ्य लाभको कामना गर्दै उपचारमा कुनै कमी हुन नदिन अस्पताल प्रशासनसँग आग्रह गरेको छ।
महासचिव पोखरेलको टोलीमा उपमहासचिव विष्णु रिमाल, स्थायी कमिटी सदस्य राजन भट्टराई, केन्द्रीय सदस्यहरू कृष्णगोपाल श्रेष्ठ (स्वास्थ्य विभाग प्रमुख), निरज आचार्य (प्रचार विभाग प्रमुख) र पार्वत गुरुङ सामेल थिए।
त्यस्तै, जिफन्टका अध्यक्ष विनोद श्रेष्ठ, भूतपूर्व सैनिक/प्रहरी संगठनका अध्यक्ष (अवकाशप्राप्त सहायक रथी) विनोद पाण्डे, मोर्चा संगठन प्रमुख विशाल भट्टराई, युवा तथा खेलकुद विभाग प्रमुख अमित लामा र प्रेस चौतारी नेपालका अध्यक्ष गणेश पाण्डे पनि नुवाकोट पुगेका थिए।
