प्रधानमन्त्री बालेन शाहले जेनजी उमेरका सांसदहरूलाई ५० वर्षका सांसदको जस्तो कुरा नगर्न सुझाव दिएका छन्।
सिंहदरबारमा राष्ट्रिय स्वतन्त्र पार्टी (रास्वपा) बाट प्रतिनिधित्व गर्ने जेनजी उमेरका सांसदहरूको भेटमा प्रधानमन्त्री शाहले आफ्नो उमेर समूह र आफूभन्दा सानो उमेरका युवाका विषय संसदमा उठाउन आग्रह गरेका हुन्।
झन्डै दुई घन्टा लामो कुराकानीको सुरूआतमा प्रधानमन्त्री शाहले आफूले धेरै अघिदेखि नयाँ पुस्ताका सांसदलाई भेट्न चाहेको भए पनि परिस्थिति नमिलेको बताएका थिए।
'हामी एउटै उमेर समूहको भएर पनि होला प्रधानमन्त्रीले खुलेर कुरा गर्नुभयो,' सांसद श्रद्धा कुँवरले सेतोपाटीसँग भनिन्, 'प्रधानमन्त्रीले जेजनी सांसद र ५० वर्ष उमेरको अर्को सांसदको कुरा एउटै हुनुहुँदैन भन्नुभयो।'
शाहले जेनजी उमेर समूहका सांसदहरूलाई कक्षा ११ र १२ मा पढ्ने युवाका कुराहरू, स्टार्टअपको विषय संसदमा उठाउन सुझाव दिए।
त्यस्तै, युवा सांसदहरूलाई आफूले गरिरहेको बिजनेस भए निरन्तरता दिन र नभए व्यवसायमा लाग्न पनि सुझाव दिए।
छलफलमा सहभागी अर्का सांसद मनिष खनालले प्रधानमन्त्री शाहले संसदमा एआई र डेटाका विषय उठाउन सुझाव दिएका थिए।
'प्रधानमन्त्रीले संसदको बैठक हेर्नु हुँदो रहेछ,' खनालले भने, 'उहाँले संसदमा नयाँपन देखिएन भन्नुभयो। फ्रेस पार्लिमेन्टेरियनले विषय उठाउँदा समाधान सहित उठाउनुहोस् भन्नुभयो।'
खनालका अनुसार प्रधानमन्त्रीले संसदमा ६०/७० वर्षका बूढा मान्छेका जस्ता कुरा नगर्न सुझाव दिएका थिए।
'जेनजी उमेर समूहका कुरा उठाउनुहोस् भन्नुभयो। युवा पुस्तालाई रोजगारीसँग जोड्ने कुरा उठाउनुहोस् भन्ने उहाँको सुझाव थियो,' खनालले भने, 'सुशासन र विधिका कुरा सदनमा सधैं उठ्छन्। तपाईंहरू समाधानसहित उठाउनुहोस् भन्नुभयो।'
सांसद कुँवरका अनुसार प्रधानमन्त्री शाहले व्यवसायमा जोडिन समेत सुझाव दिएका थिए।
'तपाईंहरू व्यवसायमा जोडिनुस्। सधैं सांसद भएर बसिँदैन। २५ वर्षमा सांसद भएको मान्छे ३० वर्षमा निस्किँदा के गर्ने?' शाहलाई उद्धृत गर्दै कुँवरले भनिन्, 'अहिले भ्रष्टाचार गरेर, राजनीति गरेर कमाउन पाइँदैन। त्यसैले व्यवसायमा लाग्नुस्।'
छलफलका सहभागी सांसद केपी खनालका अनुसार प्रधानमन्त्री शाहले स्टार्टअप र व्यवसाय गर्न जरूरी भएको बताएका थिए।
'अर्को कार्यकालमा सांसद हुनुभएन भने के हुन्छ? त्यसैले व्यवसाय भए बढाउनुपर्छ भनेर प्रधानमन्त्रीले भन्नुभयो,' खनालले भने, 'तपाईंहरू पुराना सांसद भन्दा पृथक देखिनुपर्छ भन्नुभयो।'
प्रधानमन्त्रीले जेनजी सांसदहरूलाई जनताले नेता भनेर बुझ्न नहुने बताएका थिए।
'जेनजी पृथक हुन्। आउँदो पुस्ताको कुरा गर्नुपर्छ भन्ने प्रधानमन्त्रीको धारणा थियो,' खनालले भने, 'प्रधानमन्त्रीले हामीलाई 'नेता जस्तो कुरा नगर्न' सुझाव दिनुभयो। नेताको जस्तो कुराले जनता वाक्क छन्। हामी नेताजस्तो कुरा नगरौं भन्ने प्रधानमन्त्रीको धारणा थियो।'
प्रधानमन्त्रीलाई के भने जेनजी सांसदहरूले?
प्रधानमन्त्री शाहलाई जेनजी सांसदहरूले फरक फरक विषयमा सुझाव दिएका थिए।
मधेसबाट प्रतिनिधित्व गर्ने सांसदहरूले नियुक्तिमा समावेशिताको विषय उठाएका थिए। त्यस्तै जेनजी आन्दोलनमा सहभागी भएकै कारण जेलमा रहेका युवाहरूलाई बाहिर निकाल्नुपर्ने बताएका थिए।
सांसद मनिष खनालले प्रधानमन्त्रीलाई 'डिजिटाइजेसन' बढाउन सुझाव दिएका थिए।
'विदेशमा भएका नेपालीलाई कनेक्ट गर्ने। विदेशी कम्पनीमा काम गर्ने नेपालीहरूले डलर ल्याउन अप्ठ्यारो भयो भनेर ध्यानाकर्षण गराएको विषय पनि मैले उठाएँ,' खनालले भने, 'स्पोपर्टस् डिप्लोमेसी बढाउन सुझाव पनि दिएँ।'
सांसद खनालले च्याम्पियन्स लिगको पहिलो साताको सबै खेलमा नेपालको बाढीमा ज्यान गुमाएकाहरूको सम्झनामा मौन धारण गरिएको उल्लेख गर्दै नेपालले पनि यो विषयलाई खेलकुदमार्फत उठाउनुपर्ने बताएका थिए।
'मैले डेभिड वार्नर एनपिलमा आउने कुराले नेपाल प्रिमियर लिगमा उत्साह आएको विषय, अखिल नेपाल फुटबल संघ एन्फा प्रतिबन्धित भएको विषय पनि उठाएँ,' खनालले भने, 'नारायणी नदीमा पर्यटन बढाउन आवश्यक भएको विषय पनि समेटेँ।'
सांसद श्रद्धा कुँवरले केही जेनजी उमेरका व्यक्ति सांसद भए पनि कतिपय जेनजीहरू आन्दोलनमा सहभागी भएकै कारण जेलभित्र भएको विषय उठाएकी थिइन्।
'हामी सबै युवा छौं। युवाका लागि रोजगारी सिर्जना गर्नुपर्यो भनेर मैले छलफलमा उठाएँ,' कुँवरले भनिन्, 'सरकारले ऊर्जा दियो भने हामीले पनि त्यो ऊर्जा संसदमा प्रयोग गर्न सक्छौं।'
युवाहरू राजनीतिमा उदाउनु राम्रो भए पनि युवाहरूलाई खेल र मनोरञ्जनमा पनि जोड्नुपर्ने सुझाव कुँवरको थियो।
कुँवरले चाडपर्व नजिएको तर महँगी बढेको विषय समेत छलफलमा उठाएकी थिइन्।
सांसद केपी खनालले नेपालमा बढीभन्दा बढी पर्यटक तान्न सहरको ब्युटिफिकेसन बढाउन सुझाव दिएका थिए। साथै, तराई र सुदूर पश्चिममा लागुऔषधका कारण युवाहरू गम्भीर समस्यामा रहेको बताएका थिए।
'लागुऔषधमा लागेका युवाहरूलाई जेल जाने डर देखाउनुभन्दा सुधार गृहमा पठाउने गरी सरकारले काम गर्नुपर्छ भनेर प्रधानमन्त्रीलाई भनेको छु,' सांसद खनालले भने, 'भरोसा दिनुपर्छ।'
उनले महानगरको मेयर हुँदा प्रधानमन्त्रीले शुक्रबार 'बुक फ्री डे' सञ्चालन गरेको उदाहरण दिँदै अब विद्यालयमा 'आइटी फर वान डे' कार्यक्रम देशैभर लागू गर्न सुझाव दिएका थिए।
'इ-स्पोर्टसदेखि विद्यालय सुधारसम्मको कुरा भयो,' सांसद खनालले भने, 'मैले सुदूरपश्चिममा भएको छाडा पशु चौपायको विषय पनि उठाएँ।'
प्रधानमन्त्री शाहले भने नयाँ पुस्ताका सांसदले नयाँ पुस्ताकै विषय उठाउनु उपयुक्त हुने बताएका थिए।
प्रधानमन्त्री शाहले सुहाङ नेम्वाङले केपी ओलीले उठाउने जस्तो कुरा उठाए पुस्तान्तरण हुन नसक्ने उदाहरण समेत दिएका थिए।
-1746009348.jpg)
