नेकपा एमालेको केन्द्रीय कमिटी बैठकमा अध्यक्ष केपी शर्मा ओलीले राजनीतिक प्रतिवेदनमा रूपान्तरण, हस्तान्तरण र पुस्तान्तरण बारेको आफ्नो बुझाइ समावेश गरेका छन्।
अध्यक्ष ओलीले रूपान्तरण, हस्तान्तरण र पुस्तान्तरण तीनवटा शब्द धेरै सुनिएका छन् भन्दै यी तीनैवटा आवश्यक रहेको बताए। तर यिनलाई सही अर्थमा बुझ्नुपर्ने उनको भनाइ छ।
‘रूपान्तरण भनेको इतिहास मेट्नु होइन। पार्टीको सङ्घर्ष, विचार, बलिदान र संगठनात्मक परम्परालाई अस्वीकार र अपमान गर्नु होइन। रूपान्तरण भनेको कार्यशैली बदल्नु हो जनतासँग बोल्ने भाषा बदल्नु हो; निर्णय प्रक्रिया छरितो बनाउनु हो; कमिटीलाई बैठक गर्ने औपचारिक संरचनाबाट जनताको समस्या समाधान गर्ने केन्द्रमा बदल्नु हो; नेतृत्वलाई आदेश दिने तहबाट सुन्ने, बुझ्ने र परिणाम दिने तहमा बदल्नु हो,’ अध्यक्ष ओलीले भनेका छन्, ‘पुरानो रूखमा नयाँ पालुवा ल्याउन जरा काटिँदैन। जरालाई पोषण दिएर नयाँ पालुवा हुर्काइन्छ। एमालेको इतिहास जरा हो, नयाँ पुस्ता पालुवा हो।’
उनले हस्तान्तरण पद खाली गर्ने आकस्मिक र मनमौजी घटना नभएको उल्लेख गर्दै जिम्मेवारी, ज्ञान, अनुभव, संस्था, राजनीतिक संस्कृति र निर्णय क्षमताको योजनाबद्ध हस्तान्तरण हो भनेका छन्।
‘संस्थागत तयारीबिनाको हस्तान्तरणले रिक्तता पैदा गर्न सक्छ। पुस्तान्तरण उमेरको अंकगणित मात्र होइन। नयाँ पुस्तालाई जिम्मेवारी, प्रशिक्षण, अनुभव, अवसर र निर्णयमा स्थान दिने प्रक्रिया हो। उमेर कम हुनु आफैँमा योग्यता होइन, उमेर बढी हुनु आफैमा अयोग्यता होइन। ऊर्जा र अनुभवको संयोजन आवश्यक हुन्छ। त्यसैले रूपान्तरणलाई अस्थिरताको भाषा होइन, पुनर्जागरणको भाषा बनाउनुपर्छ। हस्तान्तरण डर होइन, संस्थागत परिपक्कता हो। पुस्तान्तरण विभाजन होइन, निरन्तरताहो,’ ओलीको भनाइ छ।
उनले अध्यक्षले मार्गप्रशस्त गर्नुपर्ने आवाज पार्टीभित्र केहीले गर्ने गरेको पनि बताए।
‘यतिबेला केही व्यक्तिहरूले अध्यक्ष विस्थापित गर्ने मनसाय र प्रयासका बेमौसमी बाजा बजाइरहेको पाइएको छ र त्यसका लागि पुनर्गठनको नारा उछालिएको छ। के हो पुनर्गठन? कस्तो अवस्थामा हुन्छ? के नेतृत्व विस्थापन गर्ने कुरालाई पुनर्गठन भनिन्छ? हाम्रो धारको आन्दोलनमा कति पल्ट र कहिले कहिले पुनर्गठन भएको छ भन्ने कुरा हामीले राम्ररी बुझ्न जरूरी छ। पार्टी पुनर्गठन कुनै रहर वा लहडको विषय होइन यो त असहज र असामान्य अवस्थामा बाध्यतावस गरिने कार्य हो,’ उनले भनेका छन्।
उनले 'बुर्जुवा, दक्षिणपंथी वा हावादारी पपुलिष्ट 'निर्दलवादीहरु को प्रतिस्पर्धामा नेतृत्वको प्रश्नलाई घोलमेल गर्ने हो भने क्रान्तिकारी पार्टी रहँदैन' भनेका छन्। ‘क्याडर पार्टी होइन यथास्थितिवादी मास पार्टी मात्र रहने । पार्टी निर्माण र नेतृत्वको प्रश्नमा हामीलाई त्यसै लान खोजिँदैछ,’ उनले भने।
पार्टीका तत्कालका प्रमुख दुई कार्यभारमा अब केवल समीक्षा र विश्लेषण गरेर मात्र नपुग्ने तथा पुनर्निर्माण र पुनर्जागरणको ठोस कार्यक्रम चाहिने उल्लेख गरेका छन्।
-1789977701.png)
-1746009348.jpg)
