सत्तारूढ राष्ट्रिय स्वतन्त्र पार्टी (रास्वपा) का सांसद यज्ञमणि न्यौपानेलाई सोमबारको प्रतिनिधिसभा बैठकमा सभामुख डोलप्रसाद अर्यालले बोल्न दिएनन्।
न्यौपाने बैठक चलिरहँदा बोल्ने समय माग गर्दै आसनबाट उठेका थिए।
तर सभामुख अर्यालले जानकारी नभएको भन्दै उनको माइक अन गरिदिएनन्।
सभामुख अर्यालले सुरूआतमा न्यौपानेलाई सम्झाउने कोसिस गरे।
'जानकारी आएको छैन। त्रुटि भएको हुनसक्छ म हेर्छु,' अर्यालले भने, 'के रहेछ विषयवस्तु हेर्छु। अनि विचार गर्छु।'
तर न्यौपाने बसेनन्। बरू आफ्नो विषयवस्तु बताउनतर्फ लागे।
'मैले समय दिएको छैन बसौं,' अर्यालले अलिक कडा शैली अपनाउँदै भने, 'माननीय सदस्यलाई मैले बोल्न समय दिएको छैन। बसौं।'
तर न्यौपाने बसेनन्। अटेर गरिरहे।
संसद सचिवालयले प्रतिनिधिसभा बैठकको लाइभ भिडिओ फिड उपलब्ध गराउने गरेको छ। भिडिओमा भने यज्ञमणि न्यौपानेलाई देखाइएन।
'मैले समय दिएको छैन,' अर्यालले भने, 'त्यसैले बसेर सभा सञ्चालन गर्न सहयोग गर्नुस्।'
त्यसपछि पनि आलटाल गर्दै न्यौपाने आफ्नो स्थानमा बसे।
रास्वपा सांसद न्यौपानेलेले सोमबारको बैठकबारे सेतोपाटीलाई जानकारी दिँदै आफूले आकस्मिक प्रकृतिको विषय नै बैठकमा उठाउन खोजेको बताए।
उनले मोरङस्थित आफ्नो निर्वाचन क्षेत्रको स्वास्थ्य चौकीमा भएको नि:शुल्क वितरण हुने औषधिको गुणस्तरका विषयमा धारणा राख्न खोजेको बताए।
'एलर्जीको औषधि केही बिरामीले प्रयोग गर्दा अझ बिरामी भएको समाचार आयो,' न्यौपानेले भने, 'उक्त औषधिको नाम क्यालामाइन लोसन आइपी रहेछ। औषधिको मिति बाँकी छ, सिलप्याक छ तर औषधिमा गुणस्तर नभएको, घुलित हुन नसक्ने भएको जानकारी भयो।'
उनले उक्त औषधि देशभर बिक्री भइरहेकाले आफूले प्रश्न उठाउन खोजेको बताए।
'स्थानीय सरकारले खरिद गर्ने औषधि भएकाले प्रत्येक स्थानीय तहलाई जानकारी दिने मेरो कुनै संयन्त्र छैन,' न्यौपानेले भने, 'ढिला गर्दा थप नागरिकले उक्त औषधि प्रयोग गर्ने जोखिम भएकाले आकस्मिक समय लिन खोजेको थिएँ।'
उनले बिरामीहरूलाई रोग निको हुन औषधि चाहिएको उल्लेख गर्दै रोग जन्माउने विषका रूपमा औषधि परिणत हुन नहुने बताए।
'स्वास्थ्य चौकी उपचारको थलो हुनुपर्छ, म्याद गुज्रेको औषधि राख्ने डम्पिङ साइट होइन,' न्यौपानेले भने, 'गुणस्तरहीन औषधि स्वास्थ्य चौकीमा आइपुग्यो?'
उनले ती औषधिलाई नियन्त्रणमा लिई प्रयोगशालामा परीक्षण गरी दोषीमाथि कारबाही गर्न समेत माग गरे।
सांसद न्यौपानेले औषधिबारे आफ्नो फेसबुकमा समेत भिडिओ राखेका छन्। भिडिओमा एक जना नर्सले औषधिबारे सांसद न्यौपानेलाई प्रस्ट पार्न खोजेको देखिन्छ।
यद्यपि न्यौपानेले प्रश्न उठाएको औषधिको गुणस्तरीय थियो वा थिएन भन्नेबारे यो समाचार तयार पार्दासम्म सेतोपाटीले आधिकारिता पुष्टि गरेको छैन।
सांसद न्यौपानेले भने संसदमा आफूले उठाउन खोजेको विषय आकस्मिक प्रकृतिको भएकाले समय आफूले पाउनुपर्ने दलिल गरेका छन्।
सामान्यतया संसद बैठकको सुरूआतमा आकस्मिक समयमा सांसदहरूले बोल्ने गरेका छन्। यस्तो समय २ मिनेट निर्धारण गरिएको छ। तर विषयवस्तुको आधारमा सभामुखले समय थपघट गर्न सक्छन्। संसदमा आकस्मिक समयमा उठाउने विषय समेत सामान्यतया सभामुखलाई जानकारी दिने गरिएको छ।
सभामुखले अघिल्लो एक बैठक र अर्को बैठकको बीचमा भएका घटनाका विषयवस्तुलाई प्रतिनिधिसभाको आकस्मिक समयमा उठाउन दिने गरेका छन्।
सांसदहरूले आकस्मिक समयको दुरूपयोग गरेपछि सभामुखले पटक पटक विषयवस्तुमा केन्द्रित हुन र आकस्मिक प्रकृतिको विषय मात्र उठाउन सांसदहरूलाई रूलिङ समेत गरेका छन्।
अधिवक्ता समेत रहेका सांसद न्यौपानेले भने आकस्मिक समयबारे अब बहस गर्नुपर्ने बताएका छन्।
'मानव स्वास्थ्यमा पर्ने जोखिमको विषय मैले उठाउन खोजेको थिएँ,' न्यौपानेले भने, 'यो आकस्मिक विषयवस्तु हो। आकस्मिक समय कसलाई प्रदान गर्ने भन्नेबारे अब बहस हुनुपर्छ।'
-1746009348.jpg)
