नेकपा एमालेको जारी केन्द्रीय कमिटी बैठकमा उपाध्यक्ष विष्णु पौडेल र महासचिव शंकर पोखरेलले अध्यक्ष केपी शर्मा ओलीको प्रतिवेदनमा समर्थन जनाएका छन्।
उपाध्यक्ष पौडेलले बोल्ने क्रममा अध्यक्षको प्रतिवेदनको 'स्पिरिट' ठिक छ र यसमा मुख्य गरी आएका १५ वटा योजनाहरू जुन छन्, त्यसअनुसार अगाडि बढ्नुपर्छ भनेका छन्। ‘यसलाई समर्थन गर्छु, हामी यसरी अगाडि बढ्नुपर्छ’ उनको भनाइ छ।
बैठकमा महासचिव शंकर पोखरेलले अध्यक्षले पनि प्रतिवेदनको समर्थनमा बोले।
‘अध्यक्षले जुन रियलाइजेसन गर्नुपर्ने थियो, त्यो गर्नुभयो। त्यसकारण अब यसमा कुनै विमति गर्नुपर्ने छैन। अध्यक्षको प्रतिवेदनलाई संश्लेषण गरेर अगाडि जानुपर्छ,’ उनले भनेका छन्।
उनले ‘म आफू अध्यक्ष हुन खोजेको पनि होइन, अध्यक्ष हुनुपर्ने छैन र अध्यक्षलाई हटाउन खोजेको पनि होइन। अध्यक्षलाई हटाउन खोजियो भनेर जुन खाले व्याख्या गरियो, त्यो गलत थियो’ भनेर पनि प्रष्टीकरण दिएको केन्द्रीय कमिटीमा सहभागी एक नेताले सेतोपाटीसँग भने।
महासचिव पोखरेलले अध्यक्षको प्रतिवेदन ठिक भएको र ठिक स्पिरिटमा रहेको र यसलाई नै संश्लेषण गरेर मिलाएर अगाडि बढ्नुपर्ने पनि बताए। भोलि यसका लागि सचिवालयको बैठक बस्ने र बैठकपछि केन्द्रीय कमिटीको बैठक राख्ने समेत उनले बताएका थिए।
ललितपुरको भनिमण्डलमा आज पनि केन्द्रीय कमिटी बैठक जारी छ।
-1746009348.jpg)
