नेपाली कांग्रेसका महामन्त्री प्रदीप पौडेलले मुलुकको वर्तमान राजनीतिक परिस्थितिमा सत्तारूढ दलभन्दा प्रमुख प्रतिपक्षका रूपमा नेपाली कांग्रेस थप जिम्मेवार र परिपक्व बन्नुपर्ने बताएका छन्।
‘सत्तारूढभन्दा प्रमुख प्रतिपक्ष पार्टी नेपाली कांग्रेस बढी जिम्मेवार र परिपक्व हुनुपर्ने स्थिति छ। तसर्थ, हामीले जिम्मेवार ढंगबाट भूमिका खेल्ने वातावरण बनाउनुपर्छ र १५औँ महाधिवेशनबाट निर्वाचित हुने नेतृत्वले यस चुनौतीपूर्ण भूमिकालाई सशक्त ढंगले निर्वाह गर्ने विश्वास छ,’ बुधबार काठमाडौं महानगर अधिवेशनलाई सम्बोधन गर्दै उनले भने।
पौडेलले पार्टी पंक्तिलाई निराश नहुन आग्रह गर्दै उत्साहित भएर आफ्नो जिम्मेवारी पूरा गर्न आह्वान गरेका थिए।
महामन्त्री पौडेलले पार्टीको १५औँ महाधिवेशनमा निवर्तमान सभापति शेरबहादुर देउवालाई प्रमुख अतिथिका रूपमा सहभागी गराउने इच्छा पार्टीको रहेको पनि बताए।
पार्टीका सबै नेतालाई समेट्दै अघि बढ्ने कांग्रेसको योजना रहेको उनको भनाइ छ। महामन्त्री पौडेलले पार्टीभित्र देखिएका असन्तुष्टि र दूरीलाई कम गर्दै सबैलाई एकताबद्ध बनाएर लैजानुपर्नेमा जोड दिए।
पार्टी भित्रको एकतासँगै कांग्रेसको नेतृत्वमा देशको विकास र परिवर्तन सम्भव छ भन्ने विश्वास जनतामा जगाउनु अहिलेको आवश्यकता रहेको उनले बताए।
‘केही नेताहरू अझै बाहिर हुनुहुन्छ, हामी उहाँहरूलाई पनि आग्रह गरिरहेका छौँ कि पार्टीको मूलधारमा आइदिनुहोस्। नेपालको परिवर्तन प्रक्रियाको नेतृत्व नेपाली कांग्रेसले नै गर्न सक्छ, त्यो क्षमता र ल्याकत कांग्रेससँग छ। यसलाई आम नेपाली समाजमा थप विश्वसनीय बनाउनु नै हाम्रो प्रमुख ध्येय हो,’ उनले भने।
–न्युज एजेन्सी नेपाल
-1790072299.jpg)
-1746009348.jpg)
