आगामी असोज २२ र २३ गते कोशी प्रदेशको राजधानी विराटनगरमा मुख्यमन्त्रीहरू भेला हुने भएका छन्।
कोशी प्रदेश सरकारको आयोजनामा हुन लागेको मुख्यमन्त्री सम्मेलनमा संघीयतामा देखिएका चुनौती, प्रदेशले भोगिरहेका समस्या, प्रदेश–स्थानीय तह र संघीय सरकारबीचको समन्वय तथा अन्तरप्रदेश सहकार्यका विषयमा छलफल हुने भएको छ।
कोशी प्रदेश सरकारले सम्मेलनको तयारी सुरू गरिसकेको छ।
सम्मेलनमा प्रदेशहरूले अपनाएका असल अभ्यास आदानप्रदान गर्दै संघीयतालाई प्रभावकारी बनाउन आवश्यक विषयमा छलफल गरिने सरकारको भनाइ छ।
मुख्यमन्त्री हिक्मत कार्कीले संघीयतामा देखिएका चुनौती र प्रदेशहरूले गरेका असल अभ्यासबारे छलफल गरेर आर्थिक समृद्धि र सुशासनको बाटोमा अघि बढ्ने उद्देश्यले सम्मेलन आयोजना गर्न लागिएको बताए।
‘प्रदेशका साझा समस्या पहिचान गर्ने र समाधानका लागि आपसी समन्वय बढाउने उद्देश्यले सम्मेलन आयोजना गर्न लागिएको हो,’ कार्कीले भने।
सम्मेलनको तयारी र समन्वयको जिम्मेवारी कोशी प्रदेश योजना आयोगलाई दिइएको छ।
मुख्यमन्त्रीका आर्थिक सल्लाहकार मोहन सुवेदीले सातै प्रदेशका मुख्यमन्त्रीसँग समन्वय भइसकेको जानकारी दिए।
सम्मेलनमा प्रदेश योजना आयोगका उपाध्यक्ष, मुख्य न्यायाधिवक्ता तथा विभिन्न सरकारी अधिकारीसमेत सहभागी हुने सुवेदीले बताए।
प्रदेश योजना आयोगका उपाध्यक्ष तारानाथ निरौलाका अनुसार असोज २२ गते सातै प्रदेशका मुख्यमन्त्रीको उपस्थितिमा सम्मेलन उद्घाटन हुनेछ। त्यसपछि प्रदेशहरूले अपनाएका असल अभ्यासबारे छलफल हुनेछ।
छलफलमा प्रदेशका समस्या, संघीय सरकार र स्थानीय तहसँग गर्नुपर्ने समन्वय तथा कानुनी जटिलताका विषयमा अन्तर्क्रिया गरिने निरौलाले बताए।
सम्मेलनका क्रममा कोशी प्रदेशको पर्यटन प्रवर्द्धनका लागि मुख्यमन्त्रीहरूलाई नजिकका पर्यटकीय गन्तव्यको भ्रमण गराउने कार्यक्रमसमेत राखिएको छ।
कोशीमा हुन लागेको यो पहिलो मुख्यमन्त्री सम्मेलनलाई नियमित बनाउने तयारी समेत गरिएको छ। सातै प्रदेशबीच निरन्तर समन्वय र छलफलका लागि मुख्यमन्त्रीहरूको साझा फोरम बनाउने विषयमा पनि सम्मेलनमा छलफल हुनेछ।
कोशी प्रदेश सरकारका प्रमुख सचिव नारायणप्रसाद भट्टले सम्मेलनमा प्रदेशबीच तथा बहुप्रदेशीय साझेदारीका विषयमा छलफल हुने बताए।
उनका अनुसार प्रदेशहरूले भोगिरहेका साझा समस्या पहिचान गरेर समाधानका लागि सहकार्य गर्ने वातावरण बनाउन सम्मेलन उपयोगी हुनेछ।
‘प्रदेशबीचको सहकार्यले विकास र समृद्धिका लागि नयाँ सम्भावना खोल्न सक्छ। यसको सफलताले संघीयता कार्यान्वयन र सबलीकरणमा पनि सहयोग पुग्छ,’ भट्टले भने।
मुख्यमन्त्री कार्कीले कोशी प्रदेशका उत्पादनलाई अन्य प्रदेशमा पुर्याउने तथा अन्य प्रदेशका उत्पादन कोशीमा ल्याएर व्यापार प्रवर्द्धन गर्ने विषयमा समेत समझदारी गरिने बताए।
त्यस्तै, पर्यटन प्रवर्द्धनका सम्भावनाका विषयमा प्रदेश–प्रदेशबीच साझेदारी र सहकार्य गर्ने तयारी गरिएको उनले बताए।
सम्मेलनको तयारीका लागि आवश्यक समिति गठन गरेर कार्यविभाजन समेत गरिएको योजना आयोगले जनाएको छ।
-1788334994.jpg)
.JPG)
-1746513231.jpg)
