नेविसंघ पूर्वअध्यक्ष दुजाङ शेर्पाले पार्टी एक नभएसम्म कुनै पनि पक्षले आयोजना गर्ने महाधिवेशनमा सहभागी नहुने बताएका छन्।
कांग्रेसमा संस्थापन र इतर पक्षले छुट्टाछुट्टै महाधिवेशन गर्ने तयारी गरेका छन्।
सभापति गगन थापा पक्षले असोज १६ देखि १९ गतेसम्म १५ औं महाधिवेशन गर्ने तयारी गरेको छ भने निवर्तमान सभापति शेरबहादुर देउवा पक्षले मंसिर २१ देखि २३ गतेसम्म समानान्तर महाधिवेशन गर्ने तयारी गरेका छन्।
दुवै पक्षले छुट्टाछुट्टै महाधिवेशनको तयारी गरिरहेका बेला नेविसंघ पूर्वअध्यक्ष शेर्पाले भने आफू कुनै पनि महाधिवेशनमा सहभागी नहुने प्रतिक्रिया दिएका हुन्।
सेतोपाटीसँग कुराकानी गर्दै उनले आफू कुनै पनि महाधिवेशनमा सहभागी नहुने बताए। ‘म कुनै महाधिवेशनमा सहभागी हुन्न। बरू पार्टी एकताका लागि आफ्नो ठाउँबाट पहल गरिराख्छु,’ उनले भने।
महाधिवेशन पार्टीलाई वैधानिक र लोकतान्त्रिक रूपमा बलियो बनाउने अवसर भएकाले विभाजनलाई संस्थागत गर्ने माध्यम बन्न नहुने पनि शेर्पाको भनाइ छ।
‘महाधिवेशन पार्टीलाई वैधानिक र लोकतान्त्रिक रूपमा बलियो बनाउने महाउत्सव हुनुपर्ने हो। विभाजनलाई संस्थागत गर्ने माध्यम होइन, हुनुहुँदैन,’ उनले भने।
शेर्पालाई देउवाले नेविसंघ महाधिवेशन गराउन तदर्थ समिति अध्यक्ष बनाएका थिए। तर शेर्पाले आफ्नो कार्यकालमा नेविसंघ महाधिवेशन गराउन सकेका थिएनन्।
-1788334994.jpg)
