नेपाली कांग्रेसका निवर्तमान कार्यवाहक सभापति पूर्णबहादुर खड्का १५ औं महाधिवेशनको प्रक्रियामा सहभागी नहुने पक्षमा छन्।
विशेष महाधिवेशनसम्बन्धी आफूले दिएको मुद्दा अदालतमा विचाराधीन रहेकाले आफू महाधिवेशन प्रक्रियामा सहभागी नहुने खड्काले बताउँदै आएका छन्।
खड्काले यसअघि नै आफू महाधिवेशनको कुनै पनि प्रक्रियामा सहभागी नहुने स्पष्ट पारेका थिए। उनले भनेका थिए, ‘सम्बन्धित सबैमा प्रस्ट होस् कि यो महाधिवेशनको कुनै पनि प्रक्रियामा मेरो सहभागिता छैन–रहने छैन।’
तर, निवर्तमान सभापति खड्का निकट नेता तथा कार्यकर्ताहरू भने सभापति गगन थापा नेतृत्वको नेपाली कांग्रेसको महाधिवेशन प्रक्रियामा सहभागी भइरहेका छन्।
खड्कानिकट १४ औं महाधिवेशनका केन्द्रीय सदस्यहरू महाधिवेशन प्रक्रियामा सामेल छन्।
यतिमात्र होइन, पूर्णबहादुरका भाइ तथा प्रतिनिधि सभा सांसद विष्णुबहादुर खड्का महाधिवेशन प्रतिनिधिका लागि उम्मेदवार छन् भने पूर्णबहादुरका सचिव गौतम बिसी पनि महाधिवेशन प्रतिनिधिका लागि उम्मेदवार छन्।
विष्णुबहादुर कांग्रेस सुर्खेत उपसभापति पनि हुन्। उनी व्यवसाय पृष्ठभूमिबाट राजनीतिमा जोडिएका थिए। उनी गत फागुनको प्रतिनिधि सभा निर्वाचनमा सुर्खेत १ बाट निर्वाचित भएका थिए।
उनीहरू दुवै सुर्खेतमा जारी महाधिवेशन प्रक्रियामा सहभागी हुँदै प्रतिनिधि चयनका लागि प्रतिस्पर्धामा छन्।
पूर्णबहादुर भने भने अदालतमा मुद्दा विचाराधीन रहेको भन्दै महाधिवेशन प्रक्रियाबाट अलग रहने अडानमा छन्।
पूर्णबहादुर महाधिवेशन प्रक्रियाबाट बाहिर रहे पनि उनीनिकट नेताहरू भने गगन नेतृत्वको कांग्रेसको महाधिवेशन प्रक्रियामा सहभागी भएका छन्।
कांग्रेसले असोज १६ देखि १९ गतेसम्म काठमाडौंको खुलामञ्चमा केन्द्रीय महाधिवेशन गर्दैछ।
-1788334994.jpg)
