पूर्वप्रधान न्यायाधीश चोलेन्द्र शमशेर जबराको पक्राउको विषयलाई लिएर विपक्षी दलका सांसदहरूले सरकारसँग प्रश्न गरेका छन्।
सोमबार बसेको प्रतिनिधि सभा बैठकमा विपक्षी सांसदहरूले जबरालाई मध्यरातमा पक्राउ गरिएको घटनालाई लिएर सरकारको ध्यानाकर्षण गराएका हुन्।
नेपाली कम्युनिष्ट पार्टीका प्रमुख सचेतक युवराज दुलालले जबरालाई ‘जेनजीबाट सुरक्षा थ्रेट’ रहेको भन्दै पक्राउ गरिएको विषयमा प्रश्न उठाए।
‘पूर्वप्रधानन्यायाधीशलाई जेनजीबाट थ्रेट भनियो। गिरफ्तारी सुरक्षा थ्रेट दिनेलाई दिइन्छ कि थ्रेट हुनेलाई? यसको जवाफ सरकारले दिनुपर्छ,’ उनले भने।
उनले जबरालाई मध्यरातमा पक्राउ गरिएको घटनाले सरकार कानुनी राज्यको बाटोमा हिँडिरहेको छ कि अराजक बाटोमा भन्ने प्रश्न उठेको बताए।
‘गैरकानुनी राज्यको दृष्टान्त फेरि एकपटक देखायो। मध्यरातमा सरकारले स्टन्ट देखायो। हामी कानुनी राज्यमा छौं कि गैरकानुनी राज्यमा? कानुनी बाटोमा हिँड्दैछ कि अराजक बाटोमा?,’ उनले प्रश्न गरे।
सरकारले संवैधानिक र कानुनी बाटोबाट शासन सञ्चालन गर्नुपर्ने उनले बताए। पूर्वप्रधानमन्त्रीलाई समेत पक्राउ गरेर छाडिएको उनले उल्लेख गरे।
नेकपा एमालेका प्रमुख सचेतक ऐनबहादुर महरले पनि जबरालाई मध्यरातमा पक्राउ गरिएको घटनालाई लिएर सरकारको आलोचना गरे।
उनले जबरालाई ‘गुण्डागर्दी र अपहरण शैलीमा’ पक्राउ गरिएको दाबी गर्दै यसलाई राज्य आतंकको नमुना भएको बताए।
‘बिना कुनै कसुर, बिना कुनै अभियोग चोलेन्द्र शमशेर राणालाई यो सरकारले पक्राउ गरेको छ,’ उनले भने।
लोकतन्त्रमा कानुनभन्दा माथि कोही पनि नहुने भन्दै महरले कसैलाई पक्राउ गर्नुपर्ने भए अभियोग लगाएर कानुनी प्रक्रियाअनुसार गर्नुपर्ने बताए।
‘कोही मान्छेले कानुन हातमा लिन खोज्छ भने अभियोग लगाएर पक्राउ गर्नुपर्छ। त्यसमा हामी सहमत छौं। तर सरकारले पटकपटक पूर्वाग्रहका आधारमा, प्रतिशोधका आधारमा विरोध गरेको आधारमा तर्साउने, धम्क्याउने र हुर्मत लिने काम भएको छ,’ उनले भने।
उनले पनि ‘थ्रेट दिनेलाई पक्राउ गर्ने कि थ्रेट हुनेलाई पक्राउ गर्ने’ भन्ने प्रश्न सरकारसँग गरे। महरले सरकार जेनजी आन्दोलनकै बलमा आएको भन्दै अहिले जेनजीको बदनाम हुने गरी गतिविधि नगर्न आग्रह गरे।
राप्रपा सांसद ताहिर अलीले पनि पछिल्ला घटनाक्रमप्रति संसदको ध्यानाकर्षण गराए।
उनले संवैधानिक आयोग तथा मानव अधिकारका पदाधिकारीहरूलाई समेत भेट्न जान नदिइएको भन्दै सरकारको कार्यशैलीमाथि प्रश्न उठाए।
‘यी घटनाक्रमले कानुन, विधि र प्रक्रिया जुन कुरा हामी सदनमा बहस गरिरहेका छौं, छलफल गरिरहेका छौं। सभ्य तरिकाले मुलुकलाई चलाउने, नीति निर्धारण गर्ने कुरामा छलफल गरिरहेका छौं। सरकारको हर्कत देख्दै जाँदा सरकारले किन बाटो बिराइरहेको छ?’ उनले भने।
सरकारले आफूले गरेका बाचाबारे गम्भीर भएर सोच्नुपर्ने भन्दै उनले पछिल्ला घटनाक्रमबारे संसद र सरकारको ध्यानाकर्षण गराए।
पूर्वप्रधानन्यायाधीश जबरालाई प्रहरीले आइतबार मध्यराति बासबारीस्थित निवासबाट पक्राउ गरेको थियो। पक्राउ गरी करिब ३ बजेतिर उनलाई काठमाडौं उपत्यका अपराध अनुसन्धान कार्यालयमा ल्याइएको थियो। कार्यालयका प्रमुख एसएसपी सन्तोष खड्काले उनलाई पक्राउ नगरिएको बरू सुरक्षा थ्रेट भएकाले ल्याइएको दाबी गरेका थिए।
पछि उनलाई १० घण्टा कार्यालयमा राखेपछि प्रहरीले उनको परिवारको जिम्मामा छाडेको हो। जिम्मामा छाडेसँगै उनलाई त्यही घरमा सुरक्षा बढाएर राखिएको छ।
-1790585324.jpg)
-1788334994.jpg)
