नेपाली कांग्रेसको १५ औं महाधिवेशनअन्तर्गत विभिन्न तहमा अधिवेशन भइरहेका छन्।
यसै क्रममा गोरखामा पनि क्षेत्रीय अधिवेशन सम्पन्न भइसकेको छ। गोरखा २ को सभापतिमा सुवास अधिकारी निर्वाचित भएका छन्।
उनी यसअघि महाधिवेशन प्रतिनिधि थिए भने नेविसंघबाट पार्टी राजनीतिमा आएका युवा हुन्। अधिकारी मात्र होइन, कांग्रेस १५ औं महाधिवेशन अन्तर्गत भइरहेका अधिवेशनहरूबाट देशभर झन्डै ४४ हजार युवा नेतृत्वमा उदाएका छन्।
पार्टीको नयाँ व्यवस्थाअनुसार ३५ वर्षमुनिका झन्डै ४४ हजार युवाले पार्टीको पदीय जिम्मेवारी नै पाएको विधान मस्यौदा समितिका सदस्य सचिव प्रताप पौडेलले बताए। उनले नेपालका कुनै पार्टीमा एकै पटक यति धेरै युवाले पदीय जिम्मेवारी पाएको इतिहासमै पहिलो पटक भएको दाबीसमेत गरेका छन्।
नयाँ विधानमा हरेक वडाबाट ३५ वर्षमुनिका एक महिलासहित कम्तीमा तीन युवालाई क्षेत्रीय प्रतिनिधि निर्वाचित गराउनुपर्ने व्यवस्था रहेकाले ६ हजार ७४३ वडाबाट कम्तीमा तीन जनाको दरले २० हजार २२९ जना निर्वाचित भएका छन्। तर हरेक वडामा क्रियाशील सदस्य संख्याका आधारमा कम्तीमा तीन जनादेखि बढीमा सात जनासम्म निर्वाचित हुन सक्ने व्यवस्था छ। त्योअनुसार औसतमा पाँच जना निर्वाचित हुन्छन् भन्ने मान्दा ३३ हजार ७१५ जना ३५ वर्षमुनिका युवा क्षेत्रीय प्रतिनिधिका रूपमा निर्वाचित भएका छन्।
त्यसैगरी हरेक गाउँपालिकाको वडामा एक जना र नगरपालिकाको वडामा दुई जनाका दरले कार्यसमिति सदस्यमा निर्वाचित हुने व्यवस्था छ। नेपालमा अहिले गाउँपालिकातर्फ ३ हजार २१५ वडा रहेका छन् भने नगरपालिकातर्फ ३ हजार ५२८ वडा रहेका छन्। त्यसैले गाउँपालिकाका वडामा ३ हजार २१५ जना वडा सदस्य निर्वाचित भएका छन् भने नगरपालिकातर्फका वडाहरूमा ३ हजार ५२८ मा दुई जनाका दरले ७ हजार ५६ जना युवा वडा सदस्यमा निर्वाचित भएका छन्।
यसरी कुल क्षेत्रीय प्रतिनिधि ३३ हजार ७१५ जना र वडा सदस्य १० हजार २७१ जना गरी कुल ४३ हजार ९८६ जना युवाले पदीय जिम्मेवारी लिएका छन्।
ती पदमा निर्वाचित हुन कम्तीमा दोब्बर संख्यामा प्रतिस्पर्धीहरू रहेकाले कांग्रेसको अधिवेशनमा झन्डै एक लाख युवाले महाधिवेशनमा प्रतिस्पर्धा गरेको नेपाली कांग्रेसको केन्द्रीय निर्वाचन समितिका सदस्य सचिव अधिवक्ता राजु कटुवालले जनाएका छन्।
तीनै क्षेत्रीय प्रतिनिधिहरूमध्येबाट गाउँपालिका तथा नगरपालिकाको कार्यसमितिमा एक महिलासहित कम्तीमा तीन जना चयन भइसकेका छन् भने प्रदेश निर्वाचन क्षेत्रमा एक जना, संघीय निर्वाचन क्षेत्रको कार्यसमितिमा दुई जना र जिल्ला कार्यसमितिमा एक महिलासहित तीन जना कार्यसमितिमा निर्वाचित हुँदैछन्।
त्यसैगरी तीनै क्षेत्रीय प्रतिनिधिहरूमध्येबाट हरेक निर्वाचन क्षेत्रबाट कम्तीमा एक महिलासहित तीन जनाका दरले देशभरबाट ४९५ जना केन्द्रीय महाधिवेशन प्रतिनिधि र एक–एक जनाका दरले १६५ जना महासमिति सदस्य चयन हुन लागेको पनि निर्वाचन समितिका सदस्य सचिव कटुवालले जानकारी दिए।
नयाँ विधानअनुसार हरेक निर्वाचन क्षेत्रबाट एक महिलासहित दुई जना प्रदेश प्रतिनिधि हुनेछन् भने सातै प्रदेशमा दुई महिलासहित कम्तीमा पाँच जना प्रदेश कार्यसमिति सदस्य हुनेछन्।
केन्द्रीय कार्यसमितिमा पनि पहिलो पटक हरेक प्रदेशबाट एक युवा र एक युवतीसहित कुल १४ जना युवा प्रवेश गर्ने भएका छन्।
पार्टीमा यति ठूलो संख्यामा युवाहरूले पदीय जिम्मेवारी नै लिएको र एक लाखभन्दा बढीले उम्मेदवारी दिएर प्रतिस्पर्धा गरेकोले कांग्रेसको संगठनमा युवाको दबदबा ह्वात्तै बढेको विधान मस्यौदा समितिका सदस्य सचिव पौडेलले बताए। कांग्रेस अब पुरै युवामय पार्टी भइसकेको उनको भनाइ छ।
