नेपाली कांग्रेसको १५औँ महाधिवेशनअन्तर्गत ललितपुरका दुई क्षेत्रमा २० र २२ वर्षीया दुई युवा महिला महाधिवेशन प्रतिनिधि निर्वाचित भएका छन्।
ललितपुर क्षेत्र नम्बर ३ बाट २० वर्षीया रिजा थापा महाधिवेशन प्रतिनिधि निर्वाचित भएकी छन्।
ललितपुर महानगरपालिका–१८ की थापा शंकरदेव क्याम्पसमा बीबीएस तेस्रो वर्षमा अध्ययनरत छिन्। उनी नेपाल विद्यार्थी संघ (नेविसंघ) ललितपुर जिल्ला सहसचिवसमेत हुन्।
त्यस्तै, ललितपुर क्षेत्र नम्बर १ बाट २२ वर्षीया स्वस्तिका गौतम महाधिवेशन प्रतिनिधि निर्वाचित भएकी छन्। उनी पनि नेविसंघ ललितपुर जिल्ला सहसचिव हुन्।
क्षेत्र नम्बर १ को क्षेत्रीय अधिवेशनमा युवा महिला कोटातर्फ स्वस्तिका गौतमले खसेको ५३६ मतमध्ये ४०४ मत प्राप्त गरेकी थिइन्।
कांग्रेसले प्रत्येक क्षेत्रबाट ३५ वर्षमुनिका कम्तीमा एक महिलासहित ३ युवा महाधिवेशन प्रतिनिधि निर्वाचित गर्नुपर्ने व्यवस्था गरेको छ।
१५ औं महाधिवेशन असोज १८ देखि २१ गतेसम्म काठमाडौंमा हुँदैछ।
