नेपाली कम्युनिस्ट पार्टी (नेकपा) का प्रमुख सचेतक युवराज दुलालले प्रधानमन्त्री बालेन शाहले सांसदलाई 'एक्स्ट्रा अर्डिनरी', 'एभरेज' र 'बिलो एभरेज' गरी तीन तहमा वर्गीकरण गरेको प्रसंग उठाउँदै सत्तारूढ राष्ट्रिय स्वतन्त्र पार्टीका सभापति रवि लामिछाने कुन तहमा पर्ने हुन् भनेर प्रश्न गरेका छन्।
प्रतिनिधिसभाको बिहीबारको बैठकमा बोल्दै दुलालले प्रधानमन्त्रीले सांसदको स्तर निर्धारण गरेको विषयप्रति प्रश्न उठाएका हुन्।
'हिजो हाम्रा प्रधानमन्त्रीले सांसदहरूको स्तर निर्धारण गर्नुभएको छ, एक्स्ट्रा अर्डिनरी, एभरेज र बिलो एभरेज,' उनले भने, 'रास्वपामा रहेका इन्जिनियर सांसदहरू एक्स्ट्रा अर्डिनरीमा पर्नुभएको छ। उहाँहरूलाई बधाई छ।'
प्रधानमन्त्रीले इन्जिनियर सांसदलाई एक्स्ट्रा अर्डिनरीको संज्ञा दिएको प्रसंग उल्लेख गर्दै दुलालले रास्वपा सभापति लामिछाने कुन तहमा पर्छन् भन्ने प्रश्न गरे।
'प्रधानमन्त्री स्वयंलाई निर्देशन दिने पार्टी सभापति एभरेजमा पर्नुभयो कि बिलो एभरेजमा? अरू सांसदहरू केमा पर्नुभयो?' उनले प्रश्न गरे।
प्रधानमन्त्री शाहले सांसदलाई उनीहरूको अभिव्यक्ति, क्षमता र विज्ञताका आधारमा तीन समूहमा वर्गीकरण गरेको विषय सार्वजनिक भएको थियो।
उनले सामान्य तहका सांसदले कार्यक्रम र परियोजनाबारे छलफल गर्ने, तल्लो तहका सांसदले निर्देशन दिने र एक्स्ट्रा अर्डिनरी सांसदले नयाँ विचार, सिर्जनशीलता र विकासका योजना प्रस्तुत गर्नुपर्ने बताएका थिए।
इन्जिनियरहरू नै सांसद बनेकाले अब सरकारलाई विदेशी सल्लाहकार आवश्यक नरहेको भन्दै उनले हौस्याएका पनि थिए।
दुलालले प्रधानमन्त्रीले गरेको वर्गीकरणको आधारबारे स्पष्ट पार्नुपर्ने बताए। प्रधानमन्त्रीले सांसदको स्तर निर्धारण गर्ने आधार के हो र त्यसमा प्रधानमन्त्री तथा पार्टी सभापतिहरूको स्थान कहाँ पर्छ भन्ने उनको प्रश्न थियो।
रास्वपा सभापति लामिछाने चितवन-२ बाट निर्वाचित प्रतिनिधि सभा सदस्य हुन्। दुलालले प्रधानमन्त्रीको वर्गीकरणलाई आधार बनाएर लामिछानेको स्थानबारे प्रश्न गर्दै सांसदको मूल्यांकन गर्ने मापदण्ड र त्यसको औचित्यबारे बहस आवश्यक रहेको संकेत गरेका छन्।
