नेपाली कांग्रेसका प्रवक्ता देवराज चालिसेले पूर्वसभापति शेरबहादुर देउवाले पार्टीको असोज १८ गते दिउँसो काठमाडौंको खुलामञ्चमा हुने १५ औँ महाधिवेशन उद्घाटन गरेर देशभरका कांग्रेसजनमा उत्साह र एकताको सन्देश प्रवाह गर्ने विश्वास रहेको बताएका छन्।
शुक्रबार सानेपामा आयोजित पत्रकार सम्मेलनमा सोधिएको प्रश्नमा जबाफ दिँदै प्रवक्ता चालिसेले निवर्तमान सभापति देउवालाई महाधिवेशन उद्घाटनका लागि अनुरोध तथा निमन्त्रणा गरिने बताएका हुन्।
‘नेपाली कांग्रेसका अग्रज, सम्मानित नेता शेरबहादुर देउवा, जो निवर्तमान सभापति हुनुहुन्छ, उहाँलाई हामीले अधिवेशन उद्घाटनका लागि अनुरोध गरेका छौँ, निम्ता गर्दछौँ,’ उनले भने।
अग्रजका लागि सम्मान र युवाका लागि जिम्मेवारीको भावनाका साथ पार्टी अघि बढ्ने बताउँदै चालिसेले पूर्वसभापतिको हैसियतमा देउवाले महाधिवेशन उद्घाटन गरेर देशभरका नेता–कार्यकर्तालाई उत्साहित बनाउने र पार्टी एकताको सन्देश दिने विश्वास व्यक्त गरे।
निवर्तमान सभापति देउवा पक्षले असोज १५ देखि वडा अधिवेशन सुरू गरेका छन् भने मंसिर २१ देखि २३ गतेसम्म समानान्तर महाधिवेशन गर्ने तयारी गरेका छन्।
देउवापक्षका नेताहरू भने निवर्तमान सभापति देउवा गगन थापा नेतृत्वले गर्ने महाधिवेशनमा सहभागी नहुने बताइरहेका छन्।
कांग्रेसले महाधिवेशन उद्घाटन सत्रमा शुभकामना व्यक्त गर्न मुलुकका अधिकांश पार्टीहरू र विदेशस्थित विभिन्न पार्टीहरूलाई निम्तो पनि दिएको छ।
