प्रतिनिधि सभाको चालु अधिवेशन शुक्रबार औपचारिक रूपमा सम्पन्न भएको छ।
बैठकलाई सम्बोधन गर्दै सभामुख डोलप्रसाद अर्यालले कानून निर्माणमा सांसदहरूले देखाएको सक्रियता, संसदीय मर्यादा र सत्तापक्ष तथा प्रतिपक्षबीचको सहकार्यको प्रशंसा गरे।
सभामुख अर्यालले संसद केवल बहुमतको प्रक्रिया मात्र नभई जनमुखी बहस र संवादको थलो भएको बताउँदै जनप्रतिनिधिहरूले सोहीअनुरूप भूमिका निर्वाह गरेको उल्लेख गरे।
उनले युवा सांसदहरूको अध्ययनशीलता र परिपक्वता तथा अनुभवी सदस्यहरूको अनुभवको मिश्रणले संसदलाई थप प्रभावकारी बनाएको बताए।
सभामुख अर्यालले जलवायु परिवर्तनको मुद्दालाई प्रमुख प्राथमिकतामा राखेको स्पष्ट पारे।
उनले आफू नेतृत्वको प्रतिनिधि मण्डलले तान्जानियामा आयोजना हुन लागेको अन्तर–संसदीय सङ्घको महासभामा नेपालको तर्फबाट हिमाली मुलुकका चुनौती र जलवायु वित्तका सवालहरूलाई सशक्त रूपमा उठाउने जानकारी दिए। –न्युज एजेन्सी नेपाल
