स्याङ्जाका खुमाप्रसाद अर्यालले नेपाली कांग्रेसको आगामी १५औं महाधिवेशनमा केन्द्रीय सदस्य पदमा उम्मेदवारी दिने घोषणा गरेका छन्।
स्याङ्जा क्षेत्र नम्बर २ का अर्यालले आर्थिक व्यवस्थापन, उद्यमशीलता, शिक्षा, स्वास्थ्य तथा कृषि क्षेत्रको आफ्नो अनुभवलाई पार्टीको नेतृत्व तहमा उपयोग गर्ने एजेन्डासहित उम्मेदवारी घोषणा गरेका हुन्।
नेपाल विद्यार्थी संघबाट राजनीतिक यात्रा सुरु गरेका अर्याल कांग्रेसका तर्फबाट समानुपातिक संविधानसभा सदस्यका उम्मेदवारसमेत बनेका थिए।
पेसागत रूपमा चार्टर्ड एकाउन्टेन्ट रहेका अर्यालले ‘अर्याल एन्ड अर्याल चार्टर्ड एकाउन्टेन्ट्स’ स्थापना गरेका छन्।
उनले शिक्षा, स्वास्थ्य, कृषि, जलविद्युत् र अन्य उत्पादनमूलक क्षेत्रमा पनि लगानी गरेका छन्।
उनको लगानी भैरहवा मेडिकल कलेज (यूसीएमएस), गण्डकी मेडिकल कलेज पोखरा, नेपालगञ्ज मेडिकल कलेज, लर्ड बुद्ध मेडिकल कलेज नेपालगञ्ज र सञ्जीवनी मेडिकल कलेज दाङलगायत संस्थामा रहेको जनाइएको छ।
कृषि क्षेत्रमा पनि उनले लगानी गरेका छन्।
स्याङ्जामा पोल्ट्री फार्म तथा जनकपुरमा करिब ८ लाख ५० हजार कुखुरा क्षमताको लेयर्स फार्म सञ्चालन गरेका छन्। हेटौंडामा दाना उद्योगलगायत परियोजनामा पनि उनको लगानी रहेको छ।
अर्यालले ‘खुमा अर्याल फाउन्डेसन’मार्फत शिक्षा, स्वास्थ्य, रोजगार तथा खेलकुद क्षेत्रमा सामाजिक कार्यक्रम सञ्चालन गर्दै आएका छन्।
