राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले देशको राजनीतिक अवस्था अझै जटिल बन्दै गएको बताएका छन्।
नेपाली कांग्रेसको १५औं महाधिवेशनका क्रममा बोल्दै लिङ्देनले पाँच वर्षअघि आफूले राखेका धारणामा अहिले पनि खासै परिवर्तन नभएको बताए।
‘आम जनतामा नेताप्रति र राजनीतिप्रति वितृष्णा र घृणा थियो। त्यसमा सुधार भएको छैन,’ उनले भने, ‘यो बीचमा केही परिवर्तन भयो। मान्छेमा परिवर्तन भयो तर अहिले पनि देशको स्थिति जहाँको त्यहीँ छ।’
उनले देश अँध्यारो सुरुङतर्फ प्रवेश गरेको र राजनीतिक तरलता झन् बढ्दै गएको बताए। दलहरूसँग आक्रोश रहेको भन्दै उनले देश अझै ठीक ठाउँमा नआएको धारणा राखे।
‘देश लिकबाट बाहिर गएको अवस्था थियो। हिजो विरोध गर्यो भने गोली आउँथ्यो। आज गलत कुरा कसैले औँल्यायो भने सामाजिक सञ्जाल प्रयोग हुन्छ,’ लिङ्देनले भने, ‘पात्र फेरिएको छ, प्रवृत्ति फेरिएको छैन।’
उनले कांग्रेसको १४औं महाधिवेशनमा देखेका पूर्वप्रधानमन्त्री शेरबहादुर देउवा, माधव कुमार नेपाल, केपी ओली लगायत अहिले सहभागी नदेखेको विषय पनि बताए।
